Don Giovanni terta
Ætli megi ekki segja að Margrét Eggertsdóttir söngkona hafi verið ókrýnd tertudrottning Íslands á sinni tíð. Margrét notaði uppskriftir lítið, enda með hafsjó af reynslu og upplýsingum í kollinum. Margir föluðust eftir uppskriftum, en með bros á vör bauðst hún gjarnan til að koma frekar með tertur í veisluna, enda væri lítið mál að gera þetta „með vinstri hendina út um gluggann“, en glens og góðlátlegur húmor var aldrei langt undan þegar Margrét var annars vegar. Þessi uppskrift, kennd við Don Giovanni, er þó úr fórum Margrétar. Á dögunum var hún bökuð fyrir æfingu fjögurra óperusöngvara sem stofnað hafa kvartett og hafa æft stíft í sumar.
Ópera Mozarts, Don Giovanni var frumsýnd í Estates leikhúsinu í Prag í október 1787.
— MARGRÉT EGGERTSDÓTTIR — SÆTABRAUÐSDRENGIRNIR — TERTUR — GRAND MARNIER — AUSTURRÍKI —
.
Don Giovanni terta
Botn:
250 g marsipan, við stofuhita
250 g sykur
250 g smjör
3 egg
100 g hveiti
1/2 tsk salt
Þeytið saman marsipan, sykur og smjör. Blandið þeyttum eggjum, sigtuðu hveiti og salti saman við með sleif. Bakið í tveimur formum við 150°C í u.þ.b. 40-60 mínútur.
Krem:
2 stór matarlímsblöð
3 eggjarauður
2 msk sykur
3 msk Grand Marnier
1 peli rjómi
Leggið matarlímsblöðin í bleyti, kreistið og bræðið yfir vatnsbaði.
Þeytið eggjarauður með sykri. Bætið líkjör út í, þá þeyttum rjóma og síðast matarlími. Setjið annan botninn á tertudisk, skerið hring í miðjuna á hinum botninum, u.þ.b. 10 cm í þvermál, áður en hann er lagður ofan á neðri botninn. Látið kremið í holuna og ofan á tertuna. Skreytið með berjum og litfögrum ávöxtum sem við hendina eru, svo sem mangó, jarðarberjum, vínberjum, bláberjum, ferskjum, hindberjum, kiwi, brómberjum (fallegt að miða við fjóra liti, gult, rautt, grænt og blátt). Ef bananar eru með, vætið þá með sítrónusafa, svo að þeir dökkni ekki. Geymið tertuna í um eina klukkustund í ísskáp á meðan frómasinn stífnar.
.
— MARGRÉT EGGERTSDÓTTIR — SÆTABRAUÐSDRENGIRNIR — TERTUR — GRAND MARNIER — AUSTURRÍKI —
.
