Arabískur kjúklingur með möndlum og apríkósum. Í síðustu Frakklandsferð okkar fengum við okkur ekta tajinu eða tagínu, sem er leirpottur (fyrir ofn eða eldavél) með háuloki sem mjókkar upp. Þetta er undurgóð matreiðsluaðferð. En auðvitað er ekki nauðsynlegt að eiga svona græju, réttinn má elda í bakaraofni á lágum hita í tvær klst.
Arabískur kjúklingur með möndlum og apríkósum
6-8 kjúklingalæri
1 grænt epli (lítið), skorið í bita
1 dl apríkósur, saxaðar
1/2 dl möndlur, saxaðar gróft
2 laukar, saxaður smátt
6 tómatar, saxaðir
4 hvítlauksgeirar, smátt saxaðir
2 msk góð olía
1 msk smjör, skorið í bita
salt og pipar
chili
2 msk kanill
1/2 tsk engifer
1/2 tsk túrmerik
Úrbeinið kjúklingalærin og raðið í eldfast form. Setjið lauk, hvítlauk, apríkósur, epli og möndlur í skál, bætið saman við olíu, smjöri og tómötum. Bætið við kryddinu. Hellið úr skálinni yfir kjúklingalærin og blandið saman. Látið standa þannig í um tvo tíma. Eldið í 160° heitum ofni í amk tvær klst eða þangað til kjúklingurinn er gegnum steiktur. Já eða í tagínu.
Kæri Albert,
takk fyrir þessa fallegu síðu. Ég er búsett í Frakklandi og var hér með foreldra barna minna í mat. Við ætluðum að hafa Pizzakvöld en svo langaði mig frekar til að elda og sá þessa girnilegu uppskrift hjá þér. Þetta var vægast sagt frábær réttur og allir svo þakklátir fyrir þetta milda góða bragð…Frábært kvöld og frábær réttur. Takk fyrir að deila með okkur hinum, bestu kveðjur Steinunn
Gaman að heyra Steinunn. Gangi þér vel í Frakklandi
Sæll Albert
Er búin að horfa svo lengi á þessa uppskrift að ég næstum því finn dásamlegt bragð þó ég hafi ekki prófað hana ennþá :o) en ætla að bæta úr því fljótlega.
Nú er ég bara með smá pælingu – stendur rétturinn bara með sjálfum sér eða mælir þú með einhverju ákveðnu meðlæti ?
Með þökkum fyrir dásamlega síðu,
Kveðja, Halla
Comments are closed.