Kryddbrauð frá Hraðastöðum – ilmandi og einfalt kaffibrauð
Þetta góða kryddbrauð á sér skemmtilega sögu. Uppskriftin kemur frá Jóhönnu á Hraðastöðum og hefur ferðast langt – alla leið til Berlínar.
Árni Siemsen, sem hefur starfað í áratugi í veitingageiranum í Þýskalandi, hefur boðið upp á þetta kryddbrauð á veislum og ostahlaðborðum með öðrum kræsingum eins og brioche og góðum ostum.
Það er eitthvað sérstakt við kryddbrauð – ilmurinn sem fyllir húsið þegar það bakast og mjúka, kryddaða bragðið sem passar svo vel með smjöri eða osti.
Þetta er einfalt og fljótlegt brauð sem hentar jafnt í kaffiboð, helgarkaffi eða sem hlýlegt meðlæti á köldum dögum.
— KRYDDBRAUÐ — BERLÍN — SVISS — ÞÝSKALAND —
.
Kryddbrauð Hraðastaða
3 dl hveiti
3 dl haframjöl
3 dl púðursykur
3 dl mjólk
2 tsk matarsódi
4 tsk kakó
¼ tsk salt
½ tsk negull
1 tsk kanill
1 tsk engifer
2 egg
Aðferð:
Blandið öllum hráefnum saman í skál þar til deigið er slétt. Hellið í smurt brauðform og bakið við 175°C í um 45 mínútur.
Gott að bera fram með: smjöri og osti, rjómaosti eða jafnvel smá marmelaði
.
— KRYDDBRAUÐ — BERLÍN —