Jólahrísgrjónabúðingur með ávöxtum og möndlum

Jólabúðingur Søren Gericke í jólahefti Alt for damerne 1982. solveig k Jónsdóttir Riz à l’amande ris ala mande mand — Jólabúðingur **Søren Gericke,** uppskriftin birtist í jólahefti Alt for damerne árið 1982 en Solveig hefur þróað hann og bætt með árunum.

Jólahrísgrjónabúðingur með ávöxtum og möndlum

Hulda Steinunn og Jón Freysteinn hafa oft sagt mér frá einstaklega góðum jólaeftirrétti sem er á borðum í stórfjölskyldu Nonna. Hann er svo ljúffengur að afgangurinn er hafður sem morgunverður á jóladag. Solveig K. Jónsdóttir móðursystir Nonna tók ljúflega í að útbúa hinn hátíðlega jólahrísgrjónabúðing sem er með apríkósumauki og ferskum ávöxtum. Þess má geta að allt lof þeirra um eftirréttinn stenst. Einhver sá besti jólaeftirréttur sem ég hef smakkað.

— HULDA OG JÓN — RIZ A L´AMANDE — JÓLIN — EFTIRRÉTTIR — HRÍSGRJÓNAGRAUTUR — APRÍKÓSUR —

Jólabúðingur Søren Gericke í jólahefti Alt for damerne 1982.

Hrísgrjónabúðingur með ávöxtum og möndlum

Hrísgrjónabúðingurinn:

60 gr hvít hrísgrjón (má auka + meiri vökva)

3 dl mjólk

1 msk sykur

1 tsk vanilluessens eða ½ vanillustöng

25 gr möndluflögur

5-10 gr smjör

50 gr hrátt marsipan (Ren rå marcipan frá Odense sem er 65% möndlur)

50 gr flórsykur

2 ½ dl sýrður rjómi 36%

3 ½ dl rjómi

7 ½ matarlímsblað

1. Sjóðið graut úr hrísgrjónum, mjólk, sykri og vanilluessens. Gætið þess vel að hann brenni ekki við. Kælið. Það má gjarnan nota korn úr vanillustöng í stað vanilluessens.

2. Ristið möndluflögurnar í smjöri. Bætið marsipaninu útí við ásamt ögn af vatni og mýkið. Kælið.

3. Blandið saman sýrðum rjóma, rjóma og flórsykri og þeytið. Blandið síðan möndlu-marsipan blöndunni og kalda grautnum vandlega og varlega saman við.

4. Leggið matarlím í kalt vatn svolitla stund og mýkið. Bræðið útvatnað matarlímið. Blandið volgu matarlíminu varlega í búðinginn og hellið honum síðan í bökunarpappírsklætt springform og látið stífna í kæli í nokkra klukkutíma. Þegar búðingurinn er stífnaður er formið losað varlega utan af hliðunum og búðingnum síðan hvolft á disk. (Þá er líka rétti tíminn til að stinga heilli og óafhýddri möndlu í búðinginn fyrir möndlugjöfina.)

Apríkósumaukið:
250 gr þurrkaðar aprikósur
2 1/2 dl vatn
60 gr sykur

Ávextir útí maukið og til skrauts: – sjá lið 5 neðar.

1. Leggið aprikósurnar í bleyti yfir nótt í miklu vatni.

2. Hellið vatninu af og sjóðið aprikósurnar í mauk í vatni og sykri. Maukið í matvinnsluvél. Geymið blönduna í kæli.

5. Blandið 3-4 bollum af ferskum, söxuðum ávöxtum og berjum að eigin vali í aprikósumaukið. Maukið á að loða sæmilega saman þó ávextirnir séu komnir saman við. Setjið yfir hrísgrjónabúðinginn en ekki fyrr en stuttu áður að hann er borinn fram. Raðið sneiðum af ferskum ávöxtum og ferskum berjum ofan á til skrauts. Ávextir eru valdir eftir smekk, t.d. appelsínur, ferskjur, jarðarber, kíví, ástaraldin, ananas, vínber, bláber, rifsber, hindber, stjörnuávöxtur, blæjuber, granatepli…

Hollráð:

Best að láta matarlímsblöðin liggja góða stund í köldu vatni (1 klst. segja Danir) en ég læt þau bara liggja á meðan ég er að bræða marsipanið og elda grautinn. Svo bræði ég bara blöðin í vatninu sem enn hangir við þau þegar maður kreistir þau upp úr kalda vatninu.

Og ég blanda matarlíminu saman við rjómann þegar það eru svona við 30-40°C, ekki kæla meira en svo. Rjóminn þolir það alveg. Ekki kæla of mikið þá koma strimlar þegar matarlímið fer í kaldann rjómann.