Íslenskir royalistar. Fundur haldinn á konudaginn 2021. Þema fundarins voru lýtaaðgerðir kóngafólks
Líflegar umræður sköpuðust strax í upphafi fundar og fólk var bæði undirbúið og vel inn í málefninu. Farið var um víðan völl og myndir af konungbornu fólki skoðaðar og greindar í smáatriðum með glöggum augum Royalistafélaga. Konunglegur ritari mátti hafa sig allan við að ná helstu atriðum því af nógu er að taka. Af þeim sextán konungbornum konum sem teknar voru fyrir að þessu sinni voru þrjár sem hafa verið lang duglegastar í lýtaaðgerðum af öðrum ólöstuðum, því kalla má þær drottningar lýtaaðgerðanna. Þær eru fyrstar í upptalningunni hér á eftir, síðan koma hinar í handahófskenndri röð.
— ROYAL — DROTTNINGAR — KONUNGAR — PRINSAR — PRINSESSUR —
Letizia af Spáni (f. Letizia Ortiz Rocasolano)
Letizia er drottning af Spáni og gift Filippusi (Felipe VI Spánarkonungi) síðan 1998.
Drottningin á að baki langan feril aðgerða og hefur í raun fengið nýtt útlit frá því sem áður var. Hún er fædd árið 1972 og er því 49 ára gömul. Afar glæsileg kona. Vann áður fyrr sem blaðamaður og fréttaþulur. Höllin gaf út tilkynningu eitthvert árið um að drottningin þyrfti að fara í aðgerð vegna þrenginga í nefi. Þegar hún birtist aftur var hún með splunkunýtt nef. Fyrir utan nefaðgerðina hefur hún látið eiga við augnumgerð, kinnar, munn, höku og almennt fengið nýtt yfirbragð. Hún er einnig að daðra við fyllingarefni og botox. Okkur finnst þetta vel af sér vikið miðað við aldur. Filippus konungur sá auðvitað strax í upphafi hennar innri mann og þau hafa haldið saman í gegnum súrt og sætt. Segja má að útlitsbreytingar hafi komið Royalistum spánskt fyrir sjónir 🙂
— SPÁNN —
Charlene, furstynja af Monakó (f. Charlene Lynette Wittstock)
Charlene er gift Alberti II, fursta af Mónakó (fæddur 1958). Þau eiga tvö börn. Charlene er fædd 1978 í Suður-Afríku. Þau giftust árið 2011. Hún var margverðlaunuð keppniskona í sundi og keppti m.a. á Ólympíuleikum í Sydney 2000. Fundargestir voru sammála um að útlit hennar hefði breyst mikið í kringum 2013 frá því sem áður var. Hún er með nýtt útlit, búið að laga tanngarð, nef og fleira. Fundurinn var einnig sammála um að markmiðið með nýja útlitinu sé að hún líkist Grace Kelly heitinni, móður Alberts.
Fyrir jól 2020 sjokkeraði hún heiminn með því að raka af sér hluta hársins. Fundargestir eru ekki ánægðir með þetta útspil hennar en telja þetta vera hennar tjáningarform vegna óhamingju í hjónabandinu. Það þarf sterk bein að takast aftur og aftur á við fréttir af „nýjum börnum“ eiginmannsins.
— MÓNAKÓ —
Silvia Svíadrottning (f. Silvia Renate Sommerlath)
Silvia er gift Karli Gústaf XVI konungi Svíþjóðar. Þau eiga 3 börn. Silvía er fædd í Þýskalandi árið 1943 og verður því 78 ára á árinu. Silvía hefur farið í „nokkrar” lýtaaðgerðir!
Sennilega var hún virkust í þessu á tímabilinu 1990-2010 (mjög mikil ágiskun viðstaddra)
Munnsvipur og augnumgerð breyttist töluvert á þessum tíma.
Síðustu árin hefur hún hægt og rólega dregið úr öllu svona og fundargestir voru sammála um að það sé jákvæð og eðlileg þróun því það má nú alveg sjást að konur eldist.
— SVÍÞJÓÐ —
Sonja Noregsdrottning (f. Sonja Haraldsen)
Sonja er gift Haraldi V, Noregskonungi. Þau eiga 2 börn. Sonja er fædd 1937 og er því 84 ára á þessu ári. Þau giftu sig árið 1968 en voru krýnd konungshjón árið 1991.
Flott og glæsileg kona. Við teljum að hún hljóti að hafa gert ýmislegt fyrir útlitið án þess að við getum sett fingur á það! Að minnsta kosti eldist hún á fallegan og eðlilegan hátt en fær sér mögulega eitt og eitt rauðvínsglas á kvöldin!
— NOREGUR —
Mette-Marit krónprinsessa af Noregi (f. Mette-Marit Tjessem Høiby)
Mette-Marit er gift Hákoni krónprins af Noregi og eiga þau tvö börn saman, Ingiríðí Alexöndru og Sverri Magnús en fyrir átti Mette-Marit átti eitt barn, Marius Borg úr fyrra sambandi.
Hún er fædd 1973 og giftist prinsinum 2001. Mette-Marit vann m.a. sem þjónustustúlka og átti líflegan feril í partýstandi á sínum yngri árum. Þess vegna þótti hún ekki beint óskatengdadóttir konungshjónanna, en það hefur heldur betur breyst. Hún klæðir sig afar látlaust og er alltaf elegant. Hún er virðist ekki reyna að fela neitt eins og sagt er. Ef hún hefur farið í lýtaaðgerð er það svo fínlegt að við greinum það ekki. Hún er „naturlig skjønnhet“ og með þetta ljósa norræna yfirbragð sem fær að njóta sín.
— NOREGUR —
Máxima Hollandsdrottning (f. Máxima Zorreguieta)
Máxima er gift Vilhjálmi Alexander konungi af Hollandi. Þau eiga þrjár dætur, Katrínu Amalíu, Alexíu og Aríönnu. Máxima er fædd 1971 í Argentínu.
Fundurinn ályktar að hún hafi að minnsta kosti látið laga nefið þegar kemur að lýtaaðgerðum. Falleg kona, rokkar svolítið í vikt en fundurinn telur líklegt að hún eigi hugsanlega í vandræðum með skjaldkirtilinn.
Katrín Amalía prinsessa af Hollandi (f. Catharína-Amalía Beatrix Carmen Viktoría)
Hún er elsta dóttir Maximu og Vilhjálms, fædd 2003. Var „búttað“ barn en grenntist heilmikið í kjölfar umræðu eftir myndbirtingar af henni. Hefur án efa tekið á.
— HOLLAND —
María krónprinsessa Danmerkur (f. Mary Elizabeth Donaldson)
Mary er gift Friðriki krónprins af Danmörku. Þau eiga fjögur börn, Kristján, Ísabellu, Jósefínu og Vincent. Hún er fædd 1972 í Ástralíu og er því 49 ára. Fundargestir greina engin áberandi merki þess að Mary hafi farið í lýtaaðgerð. Ef svo er hefur það gerst í litlum skrefum og gert jöfnum höndum. Hún hefur góðan líkamsburð og engin sjáanleg þreytumerki, sem þarf að vinna á að mati fundargesta. Hún er ákaflega vinsæl meðal þegnanna.
— DANMÖRK —
Stefanía prinsessa af Mónakó (f. Stephanie Marie Elisabeth Grimaldi)
Stefanía er yngsta barn furstahjónanna af Mónakó, Rainier III og Grace Kelly leikkonu. Hún er fædd 1965, tvígift og tvífráskilin. Hún á þrjú börn, tvö með lífverði sínum Daniel Ducrueti sem hún giftist, Louis og Pauline. Þriðja barnið átti hún eftir ástarsamband við annan lífvörð sem var yfirmaður öryggismála hjá henni, Jean Raymond Gottlieb, en stúlkan heitir Camille Gottlieb. Faðerni hennar var ekki gefið upp á fæðingarvottorðinu en Camille hefur greint frá því að hann sé faðir hennar. Þar sem hún er opinberlega óskilgetin er Camille ekki í röð erfingja furstadæmisins.
Stefanía er 56 ára en hefur farið ákaflega illa með húð sína með óhóflegum sólböðum, heldur útlifuð og slitin. Hún tók upp á því fyrir nokkrum árum að fara í brjóstastækkun.
— MÓNAKÓ —
Karólína prinsessa af Mónakó (f. Caroline Louise Marguerite Grimaldi, prinsessa af Hanover)
Karólina er enn gift Ernst August prins af Hanover þrátt fyrir að þau hafi skilið að borði og sæng árið 2009. Hún hafði tvívegis verið gift áður. Hún á fjögur börn með Stefano Casiraghi sem lést í hörmulegu hraðbátaslysi árið 1990. Þeirra börn eru Andrea, Charlotte og Pierre Casiraghi og seinna átti hún Alexöndru prinsessu af Hanover með Ernst Augusti.
Karólína er falleg kona en er greinilega farin að slaka á varðandi útlitið. Alltaf huggulega klædd og tipp topp.
— MÓNAKÓ —
Karlotta Casiraghi (f. Charlotte Marie Pomeline Casiraghi)
Dóttir Karólínu prinsessu af Mónakó er ákaflega falleg ung kona, fædd 1986. Hún er númer tvö í systkinaröðinni. Þykir lík móður sinni en falleg blanda af foreldrum sínum engu að síður.
Hún er nýtt andlit hjá tískuhúsinu Chanel. Charlotte er gift Dimitri Rassam, syni leikkonunnar Carole Bouquet og franska kvikmyndaframleiðandans Jean-Pierra Rassam og er strax byrjuð á ýmsum „lagfæringum“ með útlit sitt, örlítil fyllingarefni hér og þar.
— MÓNAKÓ —
Matthildur drottning af Belgíu (f. Mathilde Marie Christine Ghislaine d´Udekem d´Acoz)
Mathilde er gift Filippusi konungi af Belgíu (Philippe). Þau giftu sig árið 1999.
Hún er fædd 1973 og eiga hjónin fjögur börn, Elisabeth, Gabriel, Emmanuel og Eléonore.
Mathilde notar sennilega létt fyllingarefni til að hressa upp á útlitið að okkar mati.
— BELGÍA —
Elena hertogaynja af Lugo, mágkona Letiziu drottningar á Spáni (Elena María Isabel Dominica de Silos Borbón y de Grecia)
Giftist Jaime de Marichalar, eignuðust tvö börn, Felipe og Victoriu. Þau skildu.
Elena er fædd 1963. Hún hefur grennst heilmikið síðustu ár og lítur ágætlega út. Virðist ekki hafa verið mikið í lýtaaðgerðum, og þó!
— SPÁNN —
Rania drottning af Jórdaníu (f. Rania Al-Yassin)
Rania er gift Abdullah II, konungi Jórdaníu og eiga þau fjögur börn, Hussein, Iman, Sölmu og Hashem.
Hún er fædd 1970 í Kuwait og því 51 árs. Er menntaður viðskiptafræðingur og vann m.a. í Citibank og hjá Apple áður en hún giftist 1993. Hún hefur verið iðin við að vekja athygli á málefnum tengd menntun, heilbrigði, tekið þátt í samfélags- og fjölmenningarlegri umræðu í Jórdaníu.
Fundargestum bar saman um að Rania hefði verið iðin þegar kemur að lýtaaðgerðum og er gjörbreytt í útliti frá því sem áður var. Fundargestir báru saman myndir til að staðfesta þetta.
Katrín hertogaynja af Cambridge (f. Catherine Elizabeth Middleton)
Katrín, eða Kate eins og hún er gjarnan kölluð, er gift Vilhjálmi bretaprins, hertoga af Cambridge (William Arthur Philip Louis). Hún fæddist árið 1982. Þau hjónin eiga þrjú börn, Georg, Karlottu og Lúðvík. Katrín hefur mikið breyst frá því á unglingsárum og hefur farið í lýtaaðgerð á nefi að við teljum. Hún er tágrönn, vandar sig alltaf við allt sem hún tekur sér fyrir hendur og heillar alla nær og fjær. Þrátt fyrir ungan aldur hefur hún látið þurrka út örfínar línur sem voru á enni og jafnframt broshrukkur við augun eða svo sýndist fundargestum.
— ENGLAND —
Meghan hertogaynja af Sussex (f. Rachel Meghan Markle)
Giftist Harry Bretaprins, sem nú er hertogi af Sussex, í Bretlandi 2018 og eiga þau soninn Archie Harrison. Meghan er fædd 1981 í Los Angeles, og verður fertug á árinu. Hún starfaði sem leikkona áður fyrr og afhenti verðlaun í vinsælum getraunaleik í sjónvarpi. Hjónin hafa sagt sig frá opinberum störfum á vegum konungsfjölskyldunnar og starfa ekki lengur sem fulltrúar góðgerðarsamtaka á hennar vegum. Þau vilja lifa sjálfstæðu lífi í Bandaríkjunum, fjarri bresku pressunni og vera með lífstílshlaðvarpsþætti á Spotify og Netflix. Meghan hefur komið víða við þegar kemur að lýtaaðgerðum. Telja fundargestir að minnsta kosti hafi verið átt við nasavængi, nefbrodd, augnsvip, efri vör og svo hafi tennur hafi breytt ögn um svip frá því sem áður var.
Ekki var tími til að fjalla um fleiri að þessu sinni en greinilegt að af nógu er að taka.
Ákveðið var að ef eitthvað gerist í konungsríkjum heimsins sem félagar í Hinu íslenska Royalistafélagi telja sig þurfa að fjalla um, þá sé hægt að boða til netfundar með stuttum fyrirvara. Ekkert er okkur óviðkomandi ef „blátt blóð“ er annars vegar.
Virðingarfyllst
Háæruverðugur konunglegur ritari þessa fundar: Vilborg
.
— ROYAL — DROTTNINGAR — KONUNGAR — PRINSAR — PRINSESSUR —
.
