Með okkar augum – uppskriftirnar
Langskemmtilegasta verkefni sem ég hef tekið þátt í, og hef ég nú tekið þátt í mörgum, eru þættirnir Með okkar augum. Í nýjustu seríunni, sem er sú ellefta í röðinni taka Steinunn Ása og Katrín að sér að dæma matinn og gefa honum einkunn – Katrín fer á kostum eins og áður og segir umbúðalaust hvað henni finnst. Í fyrsta þættinum verða laxasnittur í ýmsum útgáfum og uppskrifinar birtast hér að neðan um leið og nýjasti þátturinn fer í loftið. Missið alls ekki af.
.
— MEÐ OKKAR AUGUM — ÍSLENSKT — STEINUNN ÁSA —
.
Brauðsúpa – rúgbrauðssúpa
600 g seytt rúgbrauð
2 1/2 b maltöl
3-4 b vatn
1 msk edik
2-3 msk sítrónusafi
1/2 sítróna í sneiðum
1/2 dl rúsínur
1/3 tsk kanill
1/3 tsk salt
Þeyttur rjómi
Setjið rúgbrauð í pott ásamt malti, ediki og sítrónusafa. Sjóðið í 10 – 15 mín. Pískið kekki úr súpunni og bætið við vatni eftir þörfum. Látið að því búnu sítrónusneiðar, rúsínur, kanil og salt saman við. Berið fram með þeyttum rjóma.
Chiagrautur með bláberjum og kanil
1-2 msk. chiafræ
1/2 bolli vatn
1-2 msk. grískt jógúrt
2 msk. rjómi
bláber
jarðarber
1/2 tsk kanill
Má bragðbæta enn frekar með kakói, salti og hunangi.
Blandið saman chiafræjum, vatni, jógúrt, rjóma og kanil.Látið standa í 20 í mín í ísskáp eða yfir nótt. Setjið í skálar og bætið bláberjum og jarðarberjum við.
Ofnbakaður lax með Mangó chutney og pistasíum.
1 flak af laxi
1 b Mangó chutney
1-2 dl pistasíuhnetur.
Setjið álpappír í ofnskúffu og laxinn ofan á. Brjótið álpappírinn upp að flakinu svo mangó chutneyið renni ekki út um allt. Hellið Mangó Chutney yfir og dreifið pistasíunum yfir. Bakið í ofni við 170°C í um 20 mín. Tíminn fer bæði eftir ofnum og þykkt flaksins.
Hægeldaðar kjúklingabringur
4 kjúklingabringur
grænmeti að eigin vali, t.d. rauðlaukur, gulrætur og sæt kartafla
1 tsk fínt saxað engifer
3 msk. svartar ólífur
2-3 hvítlauksrif, söxuð smátt
1 dl þurrkaðar döðlur, skornar í bita
salt og pipar
3 msk ólífuolía
3 msk vatn
Setjið kjúklingabringur, grænmeti, döðlur, krydd, olíu og vatn í eldfast form og álpappír yfir eða leirpott með loki. Látið malla við 90°C í 3-4 klst. Takið lokið af, hækkið hitann síðustu 15 mín. og brúnið kjúklinginn.
Lummur með smörsteiktum eplum í kanil
2 1/2 dl heilhveiti
2 1/2 dl hveiti
2 1/2 tsk lyftiduft
1 msk púðursykur
1/2 tsk salt
4-5 dl mjólk
1 egg
3 msk matarolía
Látið heilhveitið, hveiti og lyftiduft í skál, bætið sykri og salti saman við.
Bætið 4 dl af mjólk saman við, eggi og matarolíu og hrærið í kekkjalaust deig. Bætið meiri mjólk út ef deigið er of þykkt. Steikið lummur á heitri pönnu.
2 epli
2 msk smjör
1 msk olía
1-2 tsk kanill
Skerið eplin og mýkið í smjörinu og olíunni á pönnu. Stráið kanil yfir og látið malla á lágum hita í nokkrar mínútur.
Setjið yfir lummurnar og berið fram með ís.
.
Þorskur í rjóma-karrý-eplasósu
Eitt þorskflak í bitum
1/2 b hveiti
1 dl ólífuolía
1 msk karrý
salt og pipar
1 dl saxað epli (eða eitt lítið epli)
1 lítil dós ananas í bitum
2 msk saxaður vorlaukur eða blaðlaukur
2-3 dl rjómi
Veltið fiskinum upp úr hveiti og steikið á pönnu í olíunni á báðum hliðum. Bætið lauk, epli, ananas, karrýi og rjóma saman við og látið sjóða í stutta stund.
.
— MEÐ OKKAR AUGUM — ÍSLENSKT — STEINUNN ÁSA —
.
