Eplakaka ömmu Söllu
„Það verður kaffi á brúsanum” sagði Hólmfríður frænka mín skólastjóri á Kirkjubæjarklaustri þegar ég „bauð mér í kaffi” á dögunum. Úr varð hin skemmtilegasta samvera í skólanum með kennurum. Sólveig Ólafsdóttir heimilisfræðikennari skellti í eplaköku og var snögg að því. Á meðan kakan bakaðist útbjó hún nokkrar dýrindis snittur með gröfnu ærkjöti og bláberjasósu.
„Eplakakan er ein af mínum uppáhalds en amma Salla í Súðavík bakaði hana oft fyrir gesti og gangandi þegar ég var að alast upp fyrir vestan. Hún bar kökuna alltaf fram með þeyttum rjóma. Sjálfri fannst mér hún alltaf best hjá ömmu!”
—EPLAKÖKUR — KIRKJUBÆJARKLAUSTUR — SÚÐAVÍK — HÓLMFRÍÐUR —
.
Eplakaka ömmu Söllu
125 g smjör/smjörlíki
150 g sykur
2 egg
250 g hveiti
2 tsk lyftiduft
1 tsk vanilludropar/vanillusykur
1 1/2 dl mjólk
1-2 græn epli
kanilsykur
Aðferð: Hrærið smjör og sykur vel saman. Því næst er einu eggi í einu hrært saman við.
Þurrefnunum hrært úti og að lokum mjólkinni og vanilludropum.
Setjið deigið í smurt form (sjálf nota ég oftast tvö 20 cm hringform). Skerið eplin í sneiðar og raðið ofan á kökuna, magn eftir smekk og stráið svo kanilsykri yfir allt.
Bakið við 180°C á blæstri í um 25 mín.
Snitturnar eru útfærsla af forrétti sem ég gerði með nemendum Kirkjubæjarskóla fyrir 10. bekkjarveisluna sem þau héldu í vor í tilefni af útskrift þeirra frá skólanum. Löng hefð er fyrir því í Kirkjubæjaskóla að nemendur sem eru að ljúka 10. bekk bjóði foreldrum sínum, starfsfólki skólans ásamt skólabílstjórum og fleirum í þriggja rétta kvöldverð sem þau matreiða með aðstoð heimilisfræðikennara og/eða umsjónarkennara.
Snittur: Grafið ærkjöt frá Borgarfelli í Skaftártungu með bláberjasósu, klettasalati og ristuðum furuhnetum.
Bláberjasósa: Grísk jógúrt, bláberjasulta og smá hunang eða hlynsýróp. Öllu hrært saman og smakkað til.
—EPLAKÖKUR — KIRKJUBÆJARKLAUSTUR — SÚÐAVÍK — HÓLMFRÍÐUR —
.
