Heill kjúklingur í ofni – safaríkur og með stökkri húð
Kjúklingur í ofni er eitt það þægilegasta sem hægt er að hafa í matinn. En hvernig verður heill kjúklingur djúsí, djúsí – afsakið, ég meinti safaríkur – og með fallega stökka húð?
Það eru einkum þrjú góð ráð sem gera gæfumuninn: Setjið niðurskorna sítrónu inn í kjúklinginn, rennið köldu smjöri undir skinnið og eldið hann rólega við 170°C. Svo er hitinn hækkaður undir lokin til að fá þessa girnilegu, gullnu og stökku húð.
Kartöflurnar fara með í fatið síðasta sprettinn og draga í sig dásamlegt bragðið úr kjúklingnum, sítrónunni og kryddjurtunum.
– KJÚKLINGUR – KJÖT – SÍTRÓNUKJÚKLINGUR – Vinsælustu kjúklingaréttirnir –
Heill kjúklingur í ofni
1 heill kjúklingur
1 sítróna
smjör
rósmarín
salt og pipar
góð olía
kartöflur, skornar í bita
tímían
Aðferð
Setjið kjúklinginn í eldfast mót með loki. Skerið sítrónuna í fernt og setjið hana inn í kjúklinginn.
Skerið nokkrar sneiðar af köldu smjöri. Losið varlega um skinnið fremst á bringunni með fingrunum og rennið smjörinu inn undir. Smjörið hjálpar til við að halda bringukjötinu safaríku og gefur gott bragð.
Kryddið kjúklinginn vel með salti, pipar og rósmaríni og hellið góðri olíu yfir. Kjúklingurinn má gjarnan standa þannig í allt að klukkutíma áður en hann fer í ofninn.
Eldið við 170°C. Sem gróft viðmið má reikna með um 55 mínútum fyrir hvert kíló, en eldunartíminn fer eftir stærð og gerð kjúklingsins. Öruggast er að nota kjöthitamæli; kjarnhiti í þykkasta hluta kjúklingsins á að ná að minnsta kosti 75°C.
Þegar um 20–25 mínútur eru eftir af eldunartímanum er lokið tekið af. Setjið kartöflubitana í fatið kringum kjúklinginn, dreifið yfir þá salti, tímíani og dálítilli olíu og hækkið hitann í 200°C.
Eldið áfram þar til kartöflurnar eru meyrar og kjúklingurinn hefur fengið fallegan gullinn lit og stökka húð.
Látið kjúklinginn hvíla í um 10 mínútur áður en hann er skorinn. Þá helst safinn betur í kjötinu.
Berið fram með kartöflunum úr fatinu og góðu fersku salati eða öðru meðlæti að vild.
Fleira áhugavert:
— Veislur hjá A&B – Heitir réttir – Ostakökur — Kartöflur — Kaffimeðlæti – Salöt — Morgunmatur — Ostakökur — Póstlisti –