Rækjufrauð
Fermingarveislur eru jafn fjölbreyttar og þær eru margar. Sumir leggja áherslu á að hafa sem flestar sortir og telja að það geri veisluna glæsilegri. En oft er ánægjulegra að njóta fárra og vel heppnaðra rétta.
Það reynist mörgum líka erfitt að áætla magn – hver kannast ekki við að hafa séð á Facebook myndir af veisluafgöngum sem duga myndu í aðra veislu?
Í minni fjölskyldu hefur skapast sú hefð, ekki aðeins í fermingum, að sá sem heldur veisluna skipti verkum á milli ættingja og vina. Í fermingu Laufeyjar nýlega var okkur falið að útbúa rækjufrauð, sem borið var fram með hunangssósu sem annar sá um. Rétturinn sló í gegn – þótt ég tæki ekki eftir því fyrr en allt var búið að rjóminn hefði átt að vera þeyttur. Það breytti þó litlu um lokaútkomuna.
— RÆKJUFRAUÐ — FISKRÉTTIR — RÆKJUR — FERMINGAR — LAUFEY BIRNA —
.
Rækjufrauð
300 g soðnar rækjur, vel þerraðar
2 búnt steinselja
½ lítri rjómi, léttþeyttur
3 dl majónes
Safi úr ½ sítrónu
1 tsk Herbes de Provence
½ dl vatn (alls ekki meira)
5–6 matarlímsblöð.
Leggið matarlímsblöðin í kalt vatn í 5–10 mínútur þar til þau mýkjast.
Hitið vatnið og sítrónusafann saman (ekki láta sjóða). Kreistið vatnið úr matarlímsblöðunum og leysið þau upp í heitum vökvanum. Látið kólna þar til blandan er volg.
Setjið rækjur og steinselju í matvinnsluvél og maukið gróflega.
Bætið majónesi og kryddi út í og blandið vel saman.
Blandið léttþeyttum rjóma varlega saman við, þannig að frauðið haldi lofti.
Hellið matarlímsblöndunni út í í mjórri bunu og hrærið varlega á meðan.
Hellið blöndunni í aflöng form (eða plastklædd brauðform), sléttið yfir og kælið í að minnsta kosti 4 klukkustundir, helst lengur.
Hvolfið úr formi við framreiðslu og skerið í sneiðar.
Hunangssósa
1 dós sýrður rjómi
1 dl rjómi, léttþeyttur
150 g majónes
2 tsk hunang
Safi úr 1 sítrónu
Smá hvítvín (má sleppa)
Blandið öllu saman þar til sósan er slétt og mjúk.
Smakkið til með sítrónusafa og hunangi.
Kælið fram að framreiðslu.
— RÆKJUFRAUÐ — FISKRÉTTIR — RÆKJUR — FERMINGAR — LAUFEY BIRNA —
.