Epli með heslihnetu-loki
Halldóra systir mín hefur marg oft komið við sögu á þessu bloggi. Það er afar auðvelt að fá matarást á henni enda galdrar hún fram heilu veislurnar án þess að blása úr nös. Við voru í „smá morgunmat” hjá henni á dögunum og þar var meðal annars boðið upp á þessa dásamlega góðu köku.
Epli með heslihnetu-loki
5 epli tekin í tvennt skræluð og kjarnhreinsuð
1 b vatn
safi úr 1/2 sítrónu
1 tsk vanillusykur
Flysjið eplin, skerið í tvennt og kjarnhreinsið. Sjóðið þau á pönnu í vanilluvatninu í nokkrar mín. Hellið vatninu af og raðið eplunum í pæmót og látið rjúka.
100 g rjómasúkkulaði með karamellukurli og salti
4 eggjahvítur
1/2 dl sykur
250 g malaðar heslihnetur
Saxið súkkulaðið og setjið yfir eplin. Stífþeytið eggjahvítur og sykur, bætið út í heslihnetum og setjið yfir eplin og súkkulaðið. Bakið við 170 °C í ca. 20 mín.
