Margrét Jónsdóttir Njarðvík – magnaður eldhugi
Fyrir tveimur árum gengum við í kringum Mont Blanc á vegum Ferðaskrifstofunnar Mundo. Ferðin tók tvær vikur og var hin skemmtilegasta í alla staði. Margrét Jónsdóttir Njarðvík er eigandi Mundo en eftir 25 ára í akademíunni bjó hún til vinnu utan um sig þar sem styrkleikar hennar og áhugamál njóta sín. Þannig innihalda allar ferðir Mundo menntun, skemmtun, menningu og þjálfun. Fjölmargir hafa farið Jakobsveginn á hennar vegum og ungmennasumarbúðir á Spáni njóta vaxandi vinsælda. Nema hvað, hún hélt matarboð fyrir vini sína og ættingja. Maturinn í veislunni tengist þremur löndum, löndum sem Margrét ætlar að ferðast til á árinu með fólk á vegum Mundo.
Svo er nú gaman að segja frá því að við Svanhvít verðum fararstjórar á vegum Mundo í matarferð til Brussel í haust 🙂 en Brussel hefur algerlega stolið senunni frá París í þeim efnum.
#2017Gestabloggari 20/52 — MARGRÉT JÓNSD NJARÐVÍK — HÁLFDÁN SVEINSSON — HÓTEL SIGLUNES — KÍNÓA — EGGALDIN —
.
Kínóa- og grænmetissúpa
2 msk ólífuolía
½ laukur, saxaður
3 hvítlauksrif, smátt söxuð
1 tsk ferskt engifer, saxað
2 meðalstórar gulrætur, skornar í sneiðar
2 sellerístilkar, skornir í bita
½ bolli kínóa
1 lítri vatn
grænmetiskraftur eftir smekk
1 tsk oreganó
¼ tsk reykt paprika
1 tsk túrmerik
salt og pipar
2 lárviðarlauf
2 bollar kartöflur, afhýddar og skornar í bita
1½ bolli grasker, skorið í bita
¼ bolli ferskt kóríander, saxað.
Hitið ólífuolíuna í stórum potti. Léttsteikið lauk, hvítlauk, engifer, gulrætur og sellerí við í 5–7 mínútur, þar til grænmetið fer að mýkjast.
Bætið kínóa út í og steikið áfram í um 5 mínútur.
Hellið vatninu út í og bætið við grænmetiskrafti, oreganó, papriku, túrmeriki, salti, pipar og lárviðarlaufum. Setjið kartöflur og grasker út í pottinn.
Látið súpuna malla við lágan hita í 20–25 mínútur, eða þar til grænmetið og kínóað eru orðin mjúkt.
Stráið loks söxuðu kóríander yfir súpuna rétt áður en hún er borin fram.
Eggaldin- og kjúklingaréttur
Eggaldin- og kjúklingaréttur
2 stórir laukar, saxaðir smátt
2 hvítlauksrif, söxuð smátt
1 kg beinlaus kjúklingur, skorinn í bita
1/4 b olía til að pensla eggaldinið með
salt og pipar
1 tsk turmerik
1/2 tsk saffran
1 dós tómatar í bitum
1 lítil dós tómatpuré
safi úr 1/2 lime
5 eggaldin
1 msk Persian dried lime (fæst í Tyrknesku búðinni í Ármúla)
Þurrsteikið á pönnu lauk, hvítlauk. Lækkið hitann og bætið við kjúklingnum ásamt salti, pipar, turmerik, smá vatni, tómat puré, niðursoðnum tómötum, limesafa, Persian dried lime og hrærið vel í. Látið malla á lágum hita í þrjú korter. Hrærið reglulega í.
Afhýðið eggaldinið og skerið í um 1 cm þykkar sneiðar langsum. Láttið liggja í köldu saltvatni í um 30 mín. Við það hverfjur bitra bragðið. Takið úr vatninu og skolið undir rennandi vatni. Þerrið á klút.
Leggið eggaldinið á bökunarpappír í ofnskúffu og penslið meðolíu á báðum hliðum. Bakið við um 160°C í 35-40 mín. Snúið við einu sinni. Eggaldinið á að bakast en ekki brenna 🙂 Takið úr ofninum og látið kólna í nokkrar mínútur.
Raðið í eldfast form:
Neðst er eggaldin, þá kjúklingur síðan annað lag af eggaldin og aftur kjúklingur. Endið á eggaldin.
Látið saffran liggja í 1/2 b af vatni og olíu í 10 mín. Setjið í blandara og mixið vel. Hellið yfir eggaldinið. Bakið við 160°C í um 30-45 mín.
Berið fram með Basmati hrísgrjónum og gúrkusósu
Gúrkusósa
1 ds Grísk jógúrt
1 agúrka, afhýdd, fræhreinsuð og söxuð smátt
1 hvítlauksrif, saxað smátt
salt og pipar
Blandið öllu saman og látið standa í ískáp í nokkrar klukkustundir
Með súpunni bauð Margrét upp á freyðivín, Jacob’s Creek Chardonnay Pinot Noir Brut sem er ósætt og ferskt með epla og perukeim. Með aðalréttinum var Casillero del Diablo sem er fallega rúbínrautt á litinn. Kirsuberja, brómberja, kaffi og eikarangan lagði af því.
Mangó- og kasjúhnetubúðingur
Ef þið eruð að leita að einföldum, hollum og fljótlegum eftirréttir sem ekki er hægt að klúðra er svarið hér. Held það sé bara ekki hægt að klúðra þessum eftirrétti. Silkimjúkur, ferskur og hollur eftirréttur. Það má eflaust frysta hann og gera þannig ís.
Mangó- og kasjúhnetubúðingur
4 mangó (ca 1,2 kg)
1 krukka kasjúhnetusmjör (170g)
8 mjúkar döðlur
Ahhýðið mangó og skerið ávöxtinn frá steininum. setjið í matvinnsluve´l ásamt kasjúhnetusmjöri og döðlunum. Maukið þangað til þetta verður silkimjúkt
Hellið í falleg glös og geymið í ísskáp í um 30 mín (eða lengur)
Mundo er ekki bara ferðaskrifstofa heldur flytur Margrét inn ólívuolíur beint frá bónda, frá bændunum í öðru þorpanna þar sem hún er með sumarbúðir. Hér má sjá seríuna sem er nauðsynlegt að hafa á hverju eldhúsborði. Munurinn á þeim er bragðið en það ræðst af þrúgunni. Margar stærðir og tegundir eru til af ólívum og ræðst bragðið af því.
.
#2017Gestabloggari 20/52 — MARGRÉT JÓNSD NJARÐVÍK — HÁLFDÁN SVEINSSON — HÓTEL SIGLUNES — KÍNÓA — EGGALDIN —
— MARGRÉT OG HÁLFDÁN – MATARBOÐIÐ —
.