Sítrónumatarboð hjá Sigurlaugu Margréti

Sigurlaug Margrét Jónasdóttir er gestgjafi af guðs náð. Ekki aðeins er hún snilldarkokkur, heldur verður andrúmsloftið létt og frjálslegt í kringum hana, þar sem allt virðist auðvelt og flest verður tilefni húmors og gjallandi hláturs.

Leiðir okkar Sigurlaugar lágu fyrst saman í geysivinsælum matarþætti, sem hún annaðist í útvarpinu. Hún hefur áður komið við sögu hér á síðunni, en við skrifuðum niður KJÚKLINGARÉTT, sem hún sagði frá í útvarpsþætti fyrir margt löngu.

— #2017Gestabloggari37/52 — SIGURLAUG MARGRÉT — ÍTALÍA —

Sítrónuboð Sigurlaugar Margrétar — Sítrónumatarboð hjá Sigurlaugu Margréti

Í matarboðinu komu Ítalía og sítrónur mikið við sögu. „Að halda veislu með þema getur verið sérlega skapandi og ánægjulegt, til dæmis er hægt að fá hugmyndir með því að fletta upp nokkrum myndum eftir Matisse, þar sem hann málar sítrónur af kátínu! Við byrjum hins vegar á tómat- og basil brúskettu, svona til að hafa afsökun til að drekka freyðivín!!” segir útvarpskonan geðþekka.

Brúskettur með tómat og basil

Gott súrdeigsbrauð, grillað eða ristað mjög vel

ferskir, íslenskir tómatar

handfylli af basil

góð ólífuolía

gróft salt.

Fræhreinsið tómatana og skerið í litla bita, setjið í skál. Blandið basil saman við og látið bíða örlitla stund.
Ristið eða grillið brauðið. Nuddið hvítlauk á það, setjið tómatana ofan á og látið góða ólífuolíu drjúpa ofan á, ásamt salti.

Sítrónurnar hans Matisse – Kjúklingur með mascarpone-osti, sítrónusafa- og berki
F 4

10 kjúklingabitar með skinni (veljið þá bita sem ykkur þykir góðir)

1 dós Mascarpone-ostur (við stofuhita, þá er betra að hræra hann saman við kryddið og sítrónuna)

ferskar kryddjurtir (timian, oreganó og rósmarín)

safi úr 1 1/2 sítrónu

börkur af einni sítrónu, rifinn

salt og pipar

Blandið saman mascarpone, ferskum kryddjurtum, sítrónusafa og berki, hrærið vel saman.
Þerrið kjúklingabitana og setjið ostablönduna undir skinnið. Klárið þó ekki alla ostablönduna, því að afganginn á að nota í sósuna.

Raðið bitunum á grind, saltið og piprið og steikið við 180°C í u.þ.b. 30 mín.

Sósa
Hitið afganginn af ostablöndunni, bætið við krafti (af kjúklingabitunum), sítrónusafa og sítrónuberki. látið malla í stutta stund.

Rósmarínkartöflur

Kartöflur skornar í bita

ólífuolía

ferskt rósmarín

salt

Hitið olíu, bætið rósmarín út í og steikið kartöflurnar í olíunni.

Risotto með sítrónu og steinselju

Að búa til risotto er eins og skemmtilegt daður, segja Ítalirnir. Það þarf að vanda sig og dansa í kringum grjónin. Það eru tvær reglur, önnur er sú að það þarf handfylli af grjónum fyrir einn og hin er að það þarf stöðugt að hræra þetta saman í 20 mínútur.

Risotto með sítrónu og steinselju

1 laukur

5 hvítlauksgeirar, saxaðir

3 msk olía

börkur af 1/2 sítrónu

safi úr 1/2 sítrónu

1 b risottóhrísgrjón

handfylli af steinselju

kjúklingasoð

hvítvínslögg (ekki nauðsyn en sérlega gott )

Skerið niður lauk og hvítlauk og steikið í olíu. Bætið grjónum út í, ásamt hvítvíni, sítrónusafa og berki . Blandið saman.
Þá byrjar daðrið: Hellið kjúklingasoðinu saman við í rólegheitum, einum bolla í einu og hrærið oft, þar til grjónin eru silkimjúk. Þetta ætti að taka 20 mínútur. Bætið sítrónusafa út í ef þarf, ásamt steinselju, salti og pipar.

Salat með melónu, mangó og sítrónumarineruðum lauk

1 cantaloupe melóna

2 vel þroskuð mangó

1 salatlaukur

safi úr 1/2 sítrónu

Skerið laukinn í þunnar sneiðar, hellið sítrónusafanum yfir laukinn og marínerið í 30 mínútur.
Skerið ávextina niður í litla bita, blandið lauknum við og stráið steinselju yfir.

Sigurlaug Margrét — Pavlova með „lemon curd“

Pavlova með „lemon curd“

4 eggjahvítur

250 gr sykur

salt

½ tsk vanilludropar

½ msk edik

½ msk kartöflumjöl

Blandið sykri rólega í eggjahvíturnar meðan þeytt er, þá salti og vanilludropum.
Þegar blandan er orðin stífþeytt, setjið edik og kartöflumjöl út í og blandið vel saman.

Myndið litlar kökur með skeið, en hægt er að gera eina stóra.
Hitið ofninn í 200°C, lækkið hann í 60°C og bakið kökurnar í hálftíma eða svo (fer eftir ofni, fylgist vel með, en þær eiga að vera svolítið blautar).

þeyttur rjómi
lemon curd eftir smekk

Skreytið með limónuberki, granateplum /ástríðuávexti