Vigur og Vesturferðir
Við fórum út í Vigur frá Ísafirði með Vesturferðum og Sjóferðum Hafsteins og Kiddýjar. Lísa Marý var leiðsögumaður, greinargóð, skýr og frábær. Siglingin tók hálftíma og svo fórum við í tveggja tíma göngutúr um eyna, þar sem Lísa Marý sagði frá kennileitum, sögu staðarins, fuglalífi o.s.frv. Krían var í essinu sínu og var það tilefni til mikillar skemmtunar, en allir voru með prik, Páll hins vegar með fínu loðhúfuna, sem ekkert bítur á.
Þá var komið á kaffihúsið til þeirra Gísla Jónssonar og Felicity Aston, þar sem þau höfðu til nýbakaða hjónabandssælu, pönnukökur og kleinur. Að lokum var bærinn skoðaður, Viktoríuhúsið, sem er glæsilegt hús í klassískum stíl. Sumarliði Sumarliðason gullsmiður reisti það um 1860 handa sér og glæsilegu heimasætunni í Vigur, Mörtu Kristjánsdóttur. Samband þeirra entist þó ekki af ýmsum ástæðum, en eftir stendur húsið og þangað er gaman að koma. M.a. hefur verið komið fyrir sýningu um sögu Vigur. Að lokum fór Lísa Marý í gegnum dúntekjuna og hreinsunina. Þetta var einstaklega skemmtilegt síðdegi í sól og blíðu.
— VESTURFERÐIR — VIKTORÍUHÚS — VIGUR — ÍSAFJÖRÐUR – FERÐUMST INNANLANDS – FERÐAST UM ÍSLAND — VESTFIRÐIR — SJÓFERÐIR HAFSTEINS&KIDDÝAR —
.
