Sítrónufrómas Stínu Sölva
Á smáréttahlaðborðinu hjá Sölva Kristni á Síreksstöðum á Vopnafirði fékk ég einhvern þann besta sítrónufrómas sem ég hef bragðað. Svo passlega stífur, ekki of sætur og sítrónubraðið hvorki of né van. Í ljós kom að Sölvi notast við uppskrift ömmu sinnar sem við Fáskrúðsfirðingar þekkjum best sem Stínu Sölva, fullu nafni hét hún Kristín Björg Jónsdóttir og var frá Þorvaldsstöðum í Breiðdal.
„… og viðhafnarveizlur voru hennar sérgrein, að standa fyrir slíku við hátíðarleg tækifæri með rausn og sæmd, þá nutu sín til fulls þeir eðalkostir hennar sem lutu að myndarskap og smekkvísi um leið” skrifar Helgi Seljan í minningargrein um Stínu.
🍋
— SÖLVI KRISTINN — SÍREKSSTAÐIR — VOPNAFJÖRÐUR — FÁSKRÚÐSFJÖRÐUR — BREIÐDALUR — FRÓMAS — EFTIRRÉTTIR —
🍋
Sítrónufrómas Stínu Sölva
3 matarlímsblöð
75 g sykur
3 egg
1 sítróna
1/2 appelsína
250 ml rjómi
Leggið matarlímið í kalt vatn í nokkar mínútur.
Rífið börkinn af sítrónunni á fínu rifjárni og geymið.
Kreistið sítrónu- og appelsínusafann í lítinn pott. Kreistið vatnið úr
matarlímsblöðunum og setjið þau út í sítrónusafann. Hitið rólega þar til
matarlímið er bráðið. Takið þá pottinn strax af hitanum og látið kólna aðeins.
Aðskiljið eggin og þeytið rauðurnar og sykurinn vel saman. Blandið sítrónuberkinum saman við. Hellið sítrónusafanum smám saman út í og þeytið vel á meðan.
Látið blönduna bíða í smástund, þar til hún er aðeins farin að þykkna.
Stífþeytið eggjahvíturnar og blandið þeim gætilega saman við með sleikju.
Þeytið rjómann, takið svolítið frá til skreytingar og blandið afganginum gætilega saman við frómasinn með sleikju.
Hellið frómasinum í fallega skál og kælið í að minnsta kosti 2-3 klst.
🍋
— SÖLVI KRISTINN — SÍREKSSTAÐIR — VOPNAFJÖRÐUR — FÁSKRÚÐSFJÖRÐUR — BREIÐDALUR — FRÓMAS — EFTIRRÉTTIR —
🍋
🍋
