Bláberja- og jarðarberjaterta
Ætli ég hafi ekki tekið það fram amk alloft, ef ekki oftar, að hrátertur eru hið mesta lostæti. Það er bara ekki hægt að klúðra þeim, þær falla ekki, þarf ekki láta lyfta sér, ekki að baka. Svo eru þær hollar og henta þeim sem eru með glútenóþol og mjólkuróþol líka. Það bara mælir allt með góðum hrátertum eins og þessari.
.
— BLÁBER — JARÐARBER — HRÁTERTUR —
.
Bláberja- og jarðarberjaterta
Botn
1 bolli möndlur
3 döðlur
2 msk vatn
½ dl kókosolía, fljótandi
1 tsk vanilluextrakt
⅓ tsk salt
Fylling
2 bollar kasjúhnetur, lagðar í bleyti í 20–30 mínútur
6 msk kókosolía, fljótandi
1 msk ferskur sítrónusafi
1 tsk vanilluextrakt
1 msk hunang
1 stór banani
1 bolli jarðarber, fersk eða frosin
1 bolli bláber, fersk eða frosin
Botn
Saxið döðlurnar gróft og setjið í matvinnsluvél ásamt möndlum, vatni, vanillu og salti. Maukið þar til massinn fer að halda saman.
Takið hringinn af litlu tertuformi og setjið á tertudisk. Þjappið deiginu jafnt í botninn.
Fylling
Setjið kasjúhnetur, kókosolíu, sítrónusafa, vanillu, hunang og banana í matvinnsluvél og maukið þar til fyllingin er alveg silkimjúk.
Skiptið fyllingunni í tvennt. Blandið bláberjum saman við annan helminginn og maukið og jarðarberjum við hinn og maukið.
Hellið bláberjafyllingunni yfir botninn og jarðarberjafyllingunni þar ofan á (eða öfugt). Sléttið úr.
Setjið tertuna í ísskáp í nokkrar klukkustundir eða yfir nótt þar til hún hefur stífnað.
— BLÁBER — JARÐARBER — HRÁTERTUR —
.