Þríhnjúkagígur – ferð inn í hjarta eldfjalls
Að fara niður í Þríhnjúkagíg er ein af þessum upplifunum sem erfitt er að lýsa með orðum. Fyrst er gengið á malarstíg yfir hrjúft mosavaxið hraunið í Bláfjallafólkvangi, síðan tekur við ferð niður í lyftu og þá opnast allt í einu nýr heimur – innviðir eldfjalls sem hefur staðið kyrrt í þúsundir ára.
Þegar ég kom niður í gíginn varð ég einfaldlega orðlaus. Litirnir í berginu, stærð rýmisins og tilfinningin að standa inni í eldfjalli eru ólýsanleg. Myndir ná þessu einfaldlega ekki.
Það sem gerði upplifunina enn betri var hversu vel var staðið að öllu. Guðmundur Ingi leiðsögumaður var fróður, rólegur og faglegur og maður fann allan tímann að öryggið var í fyrirrúmi.
Þegar upp var komið beið Pálmi Freyr með kjarngóða kjötsúpu sem bragðaðist einstaklega vel eftir ævintýrið – því miður gleymdi ég að mynda súpuna.
Það er ekki oft sem maður getur sagt að maður hafi upplifað eitthvað sem er nánast einstakt í heiminum. Þetta var einmitt þannig stund.
Ef Þríhnjúkagígur hefur verið á listanum hjá þér, þá er mitt ráð einfalt: Farðu. Þetta er upplifun sem situr með manni löngu eftir að ferðinni lýkur.
– Ísland – Kjötsúpa – English –
