Ananas-kasjú-kínóa réttur

Þessi réttur tekur dálítinn tíma, en vel þess virði. Kínóa er glútenlaust og auðmeltanlegt. Það inniheldur allar átta amínósýrurnar sem eru líkamanum nauðsynlegar – telst það ekki fullkomið prótein? Kínóa er fitulítið og inniheldur mikið af trefjum, omega 3, járni, b-vítamínum, sinki, kalki og E-vítamíni. Kínóa inniheldur jafnmikið prótein og mjólk. Tekur aðeins um 15 mín að sjóða það.

— ANANAS — KÍNÓA — KASJÚHNETUR — GLÚTEINLAUST — VEGAN —

Ananas-kasjú-kínóa réttur

Kínóa-heilkorn soðin sér með svolitlum fyrirvara:

1 bolli kínóa, skolað og síað
1 bolli ananassafi
1/2 bolli vatn
¼ tsk soja

Hitið að suðu, hrærið, lækkið hitann og sjóðið þar til vökvinn er gufaður upp. Kælið.

100 g kasjúhnetur
3 msk hnetuolía
2 vorlaukar, skornir þunnt
2 hvítlauksgeirar, marðir
1 chilipipar, mjög fínt skorinn
rúmur cm af engifer, marinn
1 paprika
1 bolli frosnar grænar baunir
½ bolli ferskt basilikum
2 msk fínt skorin mintulauf
½ ananas skorinn í munnbitastærð
3 msk soja
3 msk grænmetissoð með krafti
límóna til að skreyta með

Hafið allt tilbúið og niðurskorið.

Hitið wok pönnu, ristið kasjúhneturnar. Geymið þær á diski. Steikið vorlaukinn og hvítlaukinn í olíunni. Bætið út í chili og engifer í 2 mín. Þá papriku og baunum 3-4 mín. Þá basilikum og mintu í 1 mín.
Bætið út í ananas og kínóa, soja og grænmetissoði. Hrærið allt vel saman og hitið áfram í 10-14 mín, eða þar til kínóað er orðið vel heitt. Hneturnar yfir síðast og límónubátar.

— ANANAS — KÍNÓA — KASJÚHNETUR — GLÚTEINLAUST — VEGAN —

— ANANAS-KASJÚ-KÍNÓA-RÉTTUR —