Jarðarberjaterta Ólafs

Jarðarberjaterta

Við fögnuðum fimm ára afmæli Ólafs í dag. Afmæliskaffiborðið var hlaðið kræsingum – og þar á meðal þessi mjúka og ferska jarðarberjaterta sem hvarf hratt af diskinum.

Hrátertur eru yndislega einfaldar, fljótlegar og þægilegar í undirbúningi. Þær þarf hvorki að baka né stressa sig yfir – og útkoman er létt, silkimjúk og sumarleg.

Það má nota bæði fersk og frosin jarðarber. Ef notuð eru frosin er gott að bæta kókosolíunni út í alveg í lokin svo fyllingin verði fallega silkimjúk.

— JARÐARBERJATERTUR — HRÁTERTUR —  ÓLAFUR — JARÐARBER —

.

Jarðaberjaterta

2 dl möndlur (má leggja í bleyti)
2 dl mjúkar döðlur, steinlausar
1 msk möluð hörfræ
1/3 tsk fínt sjávarsalt

Fylling
2½ bolli kasjúhnetur (lagðar í bleyti í klst)
Safi úr 2 sítrónum
1 tsk góð vanilla
1/3 bolli kókosolía, brædd en ekki heit
1 msk gott hunang (eða hlynsíróp ef á að vera vegan)
smá salt
4 dl jarðarber.

Botn
Leggið möndlur og döðlur í bleyti í 20–30 mínútur ef þær eru harðar.
Hellið vatninu af og setjið í matvinnsluvél ásamt hörfræjum og salti.
Maukið þar til blandan verður klístruð og mótanleg.
Setjið lausan kökuhring á tertudisk og þrýstið botninum jafnt niður.
(Má fara örlítið upp með hliðunum.)
Setjið í kæli á meðan fyllingin er útbúin.

Fylling
Skolið kasjúhneturnar vel og setjið í matvinnsluvél.
Bætið sítrónusafa, vanillu, hunangi, salti og kókosolíu út í.
Maukið þar til fyllingin er alveg silkimjúk.
Bætið jarðarberjunum út í og maukið áfram þar til kremið verður fallega bleikt og loftkennt.
Hellið fyllingunni yfir botninn og kælið í nokkrar klukkustundir eða yfir nótt.

Skreyting
Skreytið með ferskum jarðarberjum og sáldrið örlitlum vanilludufti eða fíngerðu kakói yfir.

.

— JARÐARBERJATERTUR — HRÁTERTUR —  ÓLAFUR — JARÐARBER —

.