Eplakaka Ágústu Gunnars

Ágústa Gunnarsdóttir myndlistarkona og fasteignasali býr í Ann Arbor í Michigan ásamt eiginmanni sínum, Leigh Woods. Hún er ættuð frá Þorlákshöfn, dóttir sómahjónanna Gunnars Markússonar, skólastjóra og Sigurlaugar Stefánsdóttur.

— EPLAKÖKUR — ÁGÚSTA GUNNARSDÓTTIR — ÞORLÁKSHÖFN —

Ágústa er ein af þessum sem allt leikur í höndunum á, þar með talið að búa til góðan mat og terturnar hennar eru lostæti. Hér gefur hún uppskrift að eplaköku. Hún segir galdurinn að nota ekki færri en 10 epli, en hugsanlega á alúðin einhvern þátt í gæðum kökunnar!

Eplakaka Ágústu Gunnars

125 g smjör
125 g sykur
3 egg
200 g hveiti
2 tsk vanilludropar
2 tsk lyftiduft
8 til 10 epli eftir hvað þau eru stór (mér finnst best að nota súrsæt epli)
Kanilsykur
1/2 dl rjómi

Hvíthrærið saman smjör og sykur. Bætið eggjunum í einu í einu, setjið síðan vanilludropana í. Blandið saman hveiti og lyftidufti og setjið helminginn í blönduna, bætið síðan rjómanum í og síðast því sem eftir er af hveitinu.
Flysjið og hreinsið eplin, saxið 5 niður og hin 5 í báta. Setjið helminginn af deiginu í botninn á springformi (u.þ.b. 23 cm stórt) og þar ofan á söxuðu eplin, síðan hinn helminginn af deiginu og raðið ofan á það eplabátunum og stráið síðast kanilsykri yfir. Bakið í um 1 klst. Í 165°C gráðu ofni eða þangað til prjónn kemur hreinn úr miðjunni.

— EPLAKÖKUR — ÁGÚSTA GUNNARSDÓTTIR — ÞORLÁKSHÖFN —

— EPLAKAKA ÁGÚSTU —