Frönsk súkkulaðiterta
Þessi franska súkkulaðiterta er uppskrift sem hefur fylgt mér í áratugi og er alltaf jafn vinsæl. Hún er bragðmikil og algjör draumur fyrir þá sem elska alvöru súkkulaði. Þetta er ein af þessum klassísku súkkulaðitertum sem standast tímans tönn – einföld, fá hráefni og ótrúlega góð.
Einn af fjölmörgum kostum við að reka kaffihús er að þar gefst tækifæri til að prófa nýjar tertur nánast daglega og þróa þær áfram þar til þær verða fullkomnar. Þannig varð þessi franska súkkulaðiterta til – með mikilli smökkun, endurbótum og, já, óvenju miklu magni af súkkulaðitertum sem „þurfti” að borða í ferlinu.
Ef þið ætlið að nota mjólkursúkkulaði eða einhver gerfiefni í þessa uppskrift getið þið alveg eins sleppt því að baka hana 🙂
Eitt af því sem gerir góða súkkulaðitertu virkilega góða er gott hráefni: gott smjör, gott dökkt súkkulaði og smá kaffi til að dýpka bragðið.
.
— SÚKKULAÐITERTUR — FRAKKLAND — TERTUR —
.
Frönsk súkkulaðiterta
200 g smjör
200 g gott dökkt súkkulaði
1-2 msk mjög sterkt kaffi
1/2 tsk salt
4 egg
2 dl sykur
2-3 msk hveiti
Setjið súkkulaði, smjör, kaffi og salt saman í pott og hitið við vægan hita þar til smjörið og súkkulaðið eru alveg bráðnuð og blandan slétt.
Þeytið egg og sykur mjög vel saman þar til er ljóst og létt. Hrærið súkkulaðiblöndunni varlega saman við og bætið hveitinu út í að lokum.
Hellið deiginu í form og bakið. Það fer aðeins eftir ofnum hversu lengi tertan þarf að vera í ofninum og því erfitt að gefa nákvæman bökunartíma. Sjálfur baka ég þessa súkkulaðitertu í um 20 mínútur við 170°C – þá verður hún mjúk og safarík að innan.
Súkkulaðikrem
70 g smjör
150 g gott dökkt súkkulaði
2 msk síróp
⅓ tsk salt
Setjið allt saman í pott og hitið við vægan hita þar til blandan er orðin slétt og glansandi. Hellið kreminu yfir kökuna á meðan hún er enn volg.
Myndarlegi pilturinn á myndinni heitir Konráð.
.
— SÚKKULAÐITERTUR — FRAKKLAND — TERTUR —
— BESTA FRANSKA SÚKKULAÐITERTAN —
.