Makkarónuterta Margrétar

Gamaldags makkarónueftirréttur með sérrýi, perum, Toblerone og rjóma

2
Auglýsing
Makkarónuterta Margrétar Eggertsdóttur

Makkarónuterta Margrétar Eggertsdóttur

Ókrýnd tertudrottning Íslands, Margrét Eggertsdóttir altsöngkona, hefur áður komið við sögu hér á síðunni. Hún var ekki endilega mikið fyrir að dreifa uppskriftunum sínum enda byggðust þær gjarnan meira á tilfinningu en nákvæmum mælingum. Það gat því verið snúið fyrir aðra að endurtaka töfrana í eldhúsinu.

Margrét bauðst þess í stað oft til að baka sjálf fyrir fólk og sagðist geta gert það „með vinstri hendinni og hina út um gluggann“. Það munu hafa verið orð að sönnu, því hún virtist hafa lítið fyrir því að galdra fram rétti og tertur sem fólk féll í stafi yfir.

Auglýsing

Bergþór var þó nokkuð laginn við að fá hana til að setja á blað, svona sirka, hvað hún gerði. Þannig varðveittist þessi uppskrift að makkarónueftirrétti sem mun hafa verið erfitt að hætta að borða.

Og einhvern veginn ískrar húmorinn hennar Margrétar enn í gegn í upprunalegu leiðbeiningunum:

Sulla góðu sérrý á rúsínur (ekki spara það neitt voðalega mikið). Mylja makkarónur út í. Brytja suðusúkkulaði, Toblerone (ekki smátt) og perur úr dós og blanda saman við. Vel af rjóma yfir.

Í dag viljum við gjarnan hafa hlutföllin aðeins nákvæmari og því fylgir hér útfærð uppskrift. Margrét notaði niðursoðnar perur en hér nota ég ferskar. Ég held að hún fyrirgefi mér það.

Og nafnið fær að halda sér. Makkarónuterta Margrétar skal hún heita, enda kemur nafnið frá Margréti sjálfri.

– MARGRÉT EGGERTSDÓTTIR  – MAKKARÓNUKÖKUR  – PERUR  – SÉRRÝ –

Makkarónuterta Margrétar

1½ dl sérrý
1 dl rúsínur
1 bolli makkarónukökur, grófmuldar
½ Toblerone, gróft brytjað
3 ferskar perur, flysjaðar og skornar í grófa bita
½ l rjómi
rifið súkkulaði til skrauts

Hellið sérrýinu yfir rúsínurnar og látið standa í að minnsta kosti 3–4 klukkustundir.

Bætið makkarónukökum, Toblerone og perum saman við og blandið varlega saman.

Þeytið rjómann og setjið yfir. Skreytið að lokum með rifnu súkkulaði.

Fleira áhugavert:

– Vegan  – Þjóðsögur  – Föstudagskaffið  – Bananar  – Kanill  –  Glútenlaust –  Pasta  – Rabarbari  – Írland  –  Aspas  – Skinka  –

Fyrri færslaKrækiberja- og bláberjahlaup
Næsta færslaMest skoðað 2013

2 athugasemdir

  1. Sæll og blessaður, mikið var ég nú glöð að rekast á þetta blogg hjá þér, mér þykir alveg óendanlega vænt um það því makkarónukaka Margrétar er ein af uppskriftum ömmu minnar sem þú vísar í.
    Uppskriftirnar hennar ömmu eru gersemar mínir í dag þó að ég skilji þær ekki alveg þar sem hlutföllin vantar á sumar þeirra en minning um allar dásemdirnar hennar úr Hjálmholtinu lifa áfram í góðri minningu.
    Með kærri kveðju Margrét

  2. Gaman að heyra, sjálfur hef ég prófað nokkrar uppskriftir ömmu þinnar og þær eru hver annarri betri

Comments are closed.