MatBar á Hverfisgötu – Framúrskarandi veitingastaður. Afslöppuð og heimilisleg upplifun, smart hönnun, framúrskarandi matur og persónuleg þjónusta.
Hverfisgatan er óðum að breytast í flottustu veitingahúsagötuna í Reykjavík. Má þar nefna Essensia, Michelinstaðinn Dill og Geira Smart. Nýjasti staðurinn er MAT BAR, sem sómir sér vel með stóru systrum sínum við götuna.
— VEITINGASTAÐIR — ÍSLAND — HVERFISGATA —
.
Hér er glæsileg hönnun eftir þau Hafstein og Karitas hjá HAF stúdíó, en þau eru ótrúlega flottir krakkar menntaðir á Ítalíu. Staðurinn er þó ekki beint ítalskur, en eins og í ítalskri matargerð er áhersla lögð á besta fáanlegt hráefni og einfaldleika í matreiðslu. Það er allt smart, líka maturinn, litfagrir og girnilegir réttir.
Guðjón Hauksson er viðskiptafræðingur að mennt, en hefur fengist við fjölbreytt viðfangsefni, allt frá kvikmyndaframleiðslu, í að starfa við endurnýjanleg orkuverkefni í Evrópu, en matargerð hefur alltaf verið ástríða hans.
Hann lagði hugmyndina að MAT BAR til við stjórnendur Flugleiðahótela, sem voru að leita að „rétta” leigjandanum fyrir þetta rými, og þeim leist strax vel á. Staðurinn þjónar hverfinu fram á kvöld, langflestir sem koma eru Íslendingar og þegar staðurinn verður að fullu kominn í gang verður hægt að taka með sér heim. Ferðamenn láta auðvitað sjá sig og þeir geta einnig tekið með sér samlokur í ferðalög. Það er létt, notalegt og heimilislegt andrúmsloft yfir öllu hér. Mann langar bara að vera hérna!
Hér er líka hægt að kippa með sér matföngum í deli deildinni, þar sem áhersla er lögð á gourmet mat í bland frá Ítalíu og frá íslenskum framleiðendum, allt frá flögusalti yfir í osta frá litlum framleiðendum.
Sara Ósk leiddi okkur í allan sannleika um réttina á sérlega þægilegan hátt, en þar sem staðurinn er lítill, er þjónustan sérlega persónuleg, enginn vandi að hnippa í kokkana og spjalla svolítið.
Hér er um fjöldamarga góða rétti að ræða, mátulega stóra, en mælt er með 2-4 réttum. Þetta er talsvert í tísku, enda ákaflega skemmtilegt að fá áreiti um víðlendur bragðlaukanna í einum málsverði.
Við fengum splunkunýjan mozzarella ost sem er gerður úr íslenskri mjólk, en af ítölskum ostagerðarmanni. Osturinn er því einstaklega mjúkur, þar sem hann er ekki gerður fyrir geymslu. Hann líkist eiginlega ekki mikið þeim fjöldaframleidda. Og sjáið litina! Þarna eru sýrðir gulir og rauðir kirstuberjatómatar og basilikum edik. Eruð þið ekki að grínast hvað þetta er ferskt og bragðgott? (sjá uppskrift neðst)
Lamarca prosecco var borið með ostinum, og það er skemmtileg nýbreytni að hægt sé að panta sér ítalskan kokteil og drekka með matnum. Við fengum okkur Negroni sbagliato, sem þýðir jú „mistök“, eða “röng” útgáfa af vermouth og campari negroni þar sem freyðandi prosecco kemur í staðinn fyrir gin.
Osta- og skinkubakkinn takk fyrir, krakkar. Dúnmjúkar silkisneiðar af pylsu og prosciutto, 24 mánaða óburstaður gráðaostur sem hefur legið í Stout bjór, franskur geitaostur og Tindur. Stemning!
Rauðrófur með reyktri súrmjólk, karsa og ristuðum möndlum kom á óvart, smakkaðist eins og besta hnetusteik á jólum.
Arancini með svepparisotto inni í og parmesan eru seðjandi ljúfmeti.
Smjörbökuð, léttsteikt bleikja með kapers og möndluflögum kom með bakaðri fenniku og appelsínum, snilld krakkar. Það er þessi kombinasjón, hvað er það nú aftur á íslensku? Fullkomið hjónaband, samsetning sem bragðlaukar elska að glíma við.
Grillaður smokkfiskur var borinn fram með brenndri sítrónu og sýrðum rjóma (með örlítilli sítrónu) var mjög bragðsterkur, grillaður. Spennandi réttur, en sennilega ekki allra, áferðin er svolítið spes en vel þess virði að bragða á honum.
Polenta með graslauksolíu, parmesan og spicy valhnetum var dúnmjúk, matarmikil og mjög bragðmikil.
Með eftirréttunum drukkum við aftur Lamarca proseccoið. Eftirréttirnir voru ljúfasta Mozart sinfónía:
Hvítsúkkulaðiskyr með pistaccio, Bergamot appelsínum og fáfnisgrasi (estragon). Hins vegar var ganache úr dökku súkkulaði með hunangsfroðu, basilgranítu og piparmarengs.
Albert Eiríksson albert.eiriksson HJÁ gmail.com
Myndir: Bragi Bergþórsson
Mozzarella, sýrðir tómatar og basil
Fyrir 4
2-4 stk góðar mozzarella kúlur (fer eftir stærð)
200 g kirsuberjatómatar
100 g eplaedik
150 g vatn
100 g sykur
50 g basil (ferskt)
50 g góð ólífuolía
Leysið sykurinn upp í edikinu og vatninu.Skerið tómatana í tvennt og setjið í ediklögin og látið liggja í a.m.k. 2 klst. en helst í kæli yfir nótt. Saxið basillaufin fínt og blandið saman við olíuna.Sigtið vökvann frá tómötunum og blandið þeim við olíuna. Setjið á disk. Saltið mozzarella kúluna og setjið ofan á tómatana.
