Kínóa- og grænmetissúpa
Margrét Jónsdóttir í Njarðvík, eigandi ferðaskrifstofunnar Mundo, bauð til veislu á dögunum. Fyrst var borin fram þessi ilmandi kínóa- og grænmetissúpa frá Perú, síðan íranskur kjúklingaréttur og að lokum mangóeftirréttur. Allt var þetta ómótstæðilega gott.
Það er eitthvað sérstaklega þægilegt við kínóa í maga – létt, næringarríkt og samt mettandi. Kínóa er auk þess einstaklega bráðhollt, ríkt af próteini, trefjum og steinefnum. Þessi dásamlega súpa er einföld í gerð og verður jafnvel enn betri daginn eftir, þegar bragðið hefur fengið tíma til að þróast.
— SPÁNN — MUNDO — MARGRÉT JÓNS NJARÐVÍK — KÍNÓA — SÚPUR — MANGÓEFTIRRÉTTUR—
.
Kínóa- og grænmetissúpa
2 msk ólífuolía
½ laukur, saxaður
3 hvítlauksrif, smátt söxuð
1 tsk ferskt engifer, saxað
2 meðalstórar gulrætur, skornar í sneiðar
2 sellerístilkar, skornir í bita
½ bolli kínóa
1 lítri vatn
grænmetiskraftur eftir smekk
1 tsk oreganó
¼ tsk reykt paprika
1 tsk túrmerik
salt og pipar
2 lárviðarlauf
2 bollar kartöflur, afhýddar og skornar í bita
1½ bolli grasker, skorið í bita
¼ bolli ferskt kóríander, saxað.
Hitið ólífuolíuna í stórum potti. Léttsteikið lauk, hvítlauk, engifer, gulrætur og sellerí við í 5–7 mínútur, þar til grænmetið fer að mýkjast.
Bætið kínóa út í og steikið áfram í um 5 mínútur.
Hellið vatninu út í og bætið við grænmetiskrafti, oreganó, papriku, túrmeriki, salti, pipar og lárviðarlaufum. Setjið kartöflur og grasker út í pottinn.
Látið súpuna malla við lágan hita í 20–25 mínútur, eða þar til grænmetið og kínóað eru orðin mjúkt.
Stráið loks söxuðu kóríander yfir súpuna rétt áður en hún er borin fram.
🙂
— SPÁNN — MUNDO — KÍNÓA — SÚPUR —
—