Pálínuboð – allir bjóða öllum
Hin svokölluðu Pálínuboð þekkja margir. Þetta eru boð þar sem gestirnir koma sjálfir með veitingar og leggja á sameiginlegt veisluborð – allir bjóða öllum.
Allsendis er óvíst að einhver sérstök Pálína eigi heiðurinn af nafninu. Líklegra er að Pálína með prikið hafi orðið kveikjan að því.
Pálínuboð eru stórfínt fyrirkomulag. Þau auka fjölbreytnina á veisluborðinu og minnka um leið fyrirhöfnina fyrir þann sem opnar heimili sitt. Fyrirkomulagið hentar jafnt fyrir matarboð og kaffiboð, grillveislur, afmæli, fermingar, brúðkaup og jafnvel erfidrykkjur.
Langflestir eru boðnir og búnir að leggja sitt af mörkum – en smá skipulagning kemur í veg fyrir að allir mæti með ostabakka eða skyrtertu.
Pálínuboð – nokkur atriði sem gott er að hafa í huga
Skipuleggjum veitingarnar. Gott er að gestir beri hugmyndir sínar undir þann sem heldur utan um boðið. Fólk má gjarnan ákveða sjálft hvað það kemur með, en einhver þarf að hafa yfirsýn svo ekki verði tíu eftirréttir og ekkert meðlæti.
Leyfum fólki að njóta sín. Ef einhver bakar snúðaköku sem allir elska er upplagt að viðkomandi komi með hana frekar en rétt sem hann hefur aldrei gert áður.
Komum með matinn tilbúinn. Best er að það sem við komum með geti farið beint á borðið og þurfi hvorki að baka né elda á staðnum. Ef hita þarf rétt er gott að láta gestgjafann vita fyrirfram.
Tökum með viðeigandi áhöld. Ef rétturinn þarf sérstaka skeið, tertuspaða eða annað áhald er gott að það fylgi með.
Munum eftir ofnæmi og óþoli. Fólk með matarofnæmi eða -óþol þarf að láta vita með góðum fyrirvara svo hægt sé að skipuleggja veitingarnar með það í huga.
Eru börnin boðin? Það þarf að vera alveg skýrt hvort boðið nær líka til barna.
Drykkir teljast líka með. Ef tíminn er naumur getur verið upplagt að taka að sér drykkina. Ekki þarf þó endilega ótal tegundir – tvær eða þrjár geta verið alveg nóg.
Við borðum ekki bara það sem við komum með. Pálínuboð ganga einmitt út á að deila og þiggja.
Förum vel með eldhús gestgjafans. Gestir þurfa óhjákvæmilega eitthvað inn í eldhús: setja í ísskáp, ná í áhöld eða ganga frá. Gestgjafinn gerir því vel í að hafa pláss í ísskápnum og eldhúsið tilbúið fyrir smá umferð.
Ekki þarf að slá um sig. Pálínuboð eru ekki keppni í frumlegasta eða flóknasta réttinum. Góður og kunnuglegur matur sem fólk kann að útbúa er oft bestur.
Afgangarnir fara heim – en bara okkar eigin. Við tökum gjarnan með okkur afganginn af því sem við komum með. Það er hins vegar ekki í boði að mæta með Tupperware-box og safna í það smávegis af öllu áður en haldið er heim.
Allir hjálpast að við fráganginn. Allir-bjóða-öllum-boð snúast ekki aðeins um matinn. Áður en við förum heim bjóðum við að minnsta kosti fram hjálparhönd við fráganginn.
Fyrir ekki svo löngu vorum við í stórafmæli eldri konu. Gestirnir tóku sig saman og glöddu hana með kaffimeðlæti enda vildi hún hvorki gjafir né annað slíkt. Mér taldist til að um það bil ein terta hefði verið fyrir hvert ár sem konan hafði lifað.
Slíkt gengur auðvitað ekki.
Þess vegna er lykilorðið í góðu Pálínuboði einfaldlega: skipulag.
.
Fleira áhugavert:
— Bökur — Sveppir — Fiskréttir – Grautar – Salöt — Snitsel — Ossobuco — Skyrtertur – Tómatar – Flatbrauð — Þuríður Sigurðar –