Tékklisti fyrir utanlandsferðir.
Við bregðum stundum undir okkur betri fætinum og höldum til útlanda. Reynslan hefur kennt okkur að útbúa gátlista fyrir utanlandsferðirnar. Þetta er ótrúlega þægilegt og minnkar allt stress til muna, stressið sem myndast oft á síðustu stundu. Listinn saman stendur af grunnatriðum en ekki hvort eigi að taka með fern sokkapör eða síðermaskyrtu. Áfangastaður, veðurspá og lengd ferðalagsins ræður mestu um hvað fer í töskuna af fatnaði. Tékklistinn er svo uppfærður reglulega, helst í hverri ferð því það er segin saga að ýmislegt vill gleymast þegar heim er komið.
Á listanum stendur meðal annars: vegabréfin, flugvélanesti(þar eru nokkrar hugmyndir), tóm flaska fyrir vatn, afþreying í vélinni (10 hugmyndir), sólgleraugu, hleðslutæki, evrur/peningar og húslyklar.
Elín vinkona mín Pálmadóttir tók saman tékklista fyrir utanlandsferð sem hún og vinkonur hennar fóru í árið 1955*. Hann er mun ítarlegri en okkar list. Þetta tóku þær með sér:
Nælonnærföt, sex pör af nælonsokkum, nælonnáttkjóll. Dragt, frakki, 2 peysur, stutterma og langerma, nælonblússa, léreftskjóll, fínn sumarkjóll sem ekki krumpast og hægt er að þvo, og hattur sem má brjóta saman og nota bæði í kirkju og koktelboð. Sandalar, götuskór og háhælaðir skór, rúmgott veski og hanskar í lit, sem fer vel við allan annan klæðnað. Slæða, regnhlíf og höfuðklútur. Eyrnalokkar og hálsfesti. Handklæði, þvottapoki, krem, hárbursti, tannbursti, önnur snyrtitæki. Skyndiplástur, nál, tvinni, öryggisnælur, sápa, herðatré til að þurrka nælonblússuna á, skóáburður skóbursti og fatabursti. Sundbolur og strandföt. Létt strigataska, vegabréf, ferðatékkar og erlend smámynt fyrir strætisvagninn frá flugvellinum.
*listinn birtist í Morgunblaðinu
— MATARBORGIR — FERÐALÖG — ELÍN PÁLMADÓTTIR —
— TÉKKLISTI FYRIR UTANLANDSFERÐIR —
.
