Skúffukaka sem klikkar aldrei
Dagný Reykjalín hjá Blekhönnun á Akureyri hannaði og útbjó nýja heimasíðu fyrir mig. Það má segja að hún sé með augu á hverjum fingri þegar kemur að heimasíðum og öðru tengdu netinu. Eins og gengur í nútímanum þá fóru samskipti okkar að mestu fram í gegnum tölvuna og símann. Um helgina bauð Dagný í kaffi og skúffuköku sem fjölskyldan bakar reglulega og er búin að þróa og betrumbæta. Rakel fjögurra ára dóttir Dagnýjar aðstoðaði við að skreyta tertuna og var hin ræðnasta ásamt bræðrum sínum sem tóku myndir 🙂 Skúffukakan er hreinasta lostæti, held bara sú besta sem ég hef smakkað.
.
— AKUREYRI — SÚKKULAÐITERTUR — BAKAÐ MEÐ BÖRNUM — VÖFFLUR — SKÚFFUKÖKUR —
.
Skúffukaka sem klikkar aldrei
1,5 dl matarolía (ólífuolía eða önnur góð, nota aldrei smjörlíki og finnst olían betri en smjör)
2 egg (við stofuhita, ágætt að ylja í volgu vatni í smá stund)
3,5 dl sykur
4,5 dl hveiti (Kornax í bláu pokunum helst)
1 tsk natron
1 tsk vínsteinslyftiduft
1 tsk salt
1 dl bökunar kakó (nota Cadbury’s), sigtað
3 tsk vanillusykur eða 2 tsk vanilludropar
2-2,5 dl grísk jógúrt, karamellujógúrt eða ab mjólk
1,5-2 dl vatn
Olía og sykur þeytt saman og eggjum bætt í og hrært vel á milli, þeytt vel saman.
Rest bætt við og hrært saman í smá stund. Deigið á að vera frekar þunnt og fullt af loftbólum 🙂
Stundum set ég saxað rjómasúkkulaði í deigið eða smá kanil til hátíðarbrigða 🙂
Bakað í skúffukökuformi neðst í ofni við 180-200 gráður í 20-30 min (hiti og tími fer eftir ofnum, þegar kakan hefur alveg risið og prjónn kemur hreinn út þá er hún tilbúin). Kakan á myndinni er bökuð í formi sem er 23x33cm að innanmál.
Krem:
ca 100gr smjör, við stofuhita eða mýkt örlitla stund í örbylgju, passa að það bráðni ekki, ágætt að þeyta það með píski til að losna við kekki
4-5 dl flórsykur, fer svolítið eftir smjörmagninu (og magni af kremi sem maður vill), ég slumpa yfirleitt á þetta.
2-3 msk kakó, sigtað, má vera minna eða meira
3 tsk vanillusykur
1-2 msk vatn, mjólk eða kaffi til að þynna og mýkja
Kreminu er smurt á kökuna þegar hún hefur kólnað vel, má samt vera pínu volg, þá bráðnar kremið svo dásamlega niður í kökuna 😉
kókosmjöli dreift yfir og nammi eða ávöxtum.
.
— AKUREYRI — SÚKKULAÐITERTUR — BAKAÐ MEÐ BÖRNUM — VÖFFLUR — SKÚFFUKÖKUR —
