Skúffukaka sem klikkar aldrei

Skúffukaka sem klikkar aldrei

Dagný Reykjalín hjá Blekhönnun á Akureyri hannaði og útbjó nýja heimasíðu fyrir mig – og það má með sanni segja að hún sé með augu á hverjum fingri þegar kemur að öllu sem tengist netinu.

Eins og gengur í nútímanum fóru samskipti okkar að mestu fram í gegnum tölvu og síma, en um helgina bauð Dagný mér loksins í kaffi. Þar beið mín heimagerð skúffukaka sem fjölskyldan hennar hefur þróað og betrumbætt í gegnum tíðina.

Rakel, fjögurra ára dóttir Dagnýjar, aðstoðaði við skreytingarnar af mikilli natni og var hin ræðnasta – ásamt bræðrum sínum sem tóku að sér ljósmyndunina 📸

Ég segi það alveg eins og er:
þetta er líklega besta skúffukaka sem ég hef smakkað.

.

— AKUREYRI — SÚKKULAÐITERTUR — BAKAÐ MEÐ BÖRNUM — VÖFFLUR — SKÚFFUKÖKUR —

.

Skúffukaka sem klikkar aldrei

1,5 dl matarolía (ólífuolía eða önnur góð, nota aldrei smjörlíki og finnst olían betri en smjör)
2 egg (við stofuhita, ágætt að ylja í volgu vatni í smá stund)
3,5 dl sykur

4,5 dl hveiti (Kornax í bláu pokunum helst)
1 tsk natron
1 tsk vínsteinslyftiduft
1 tsk salt
1 dl bökunar kakó (nota Cadbury’s), sigtað
3 tsk vanillusykur eða 2 tsk vanilludropar
2-2,5 dl grísk jógúrt, karamellujógúrt eða ab mjólk
1,5-2 dl vatn

Þeytið olíu og sykur saman.
Bætið eggjunum út í, einu í einu, og hrærið vel á milli.
Bætið restinni af hráefnunum út í og hrærið stuttlega saman.

Deigið á að vera frekar þunnt og fullt af loftbólum – það er lykillinn að mjúkri köku.

Bakið
Setjið í skúffukökuform (t.d. 23 × 33 cm)
Bakið neðst í ofni við 180–200°C í 20–30 mínútur

Kakan er tilbúin þegar hún hefur risið vel og prjónn kemur hreinn út.

Krem
ca. 100 g smjör (við stofuhita)
4–5 dl flórsykur
2–3 msk kakó, sigtað
3 tsk vanillusykur
1–2 msk vatn, mjólk eða kaffi
Aðferð
Þeytið smjörið þar til það verður mjúkt og kekkjalaust
Bætið flórsykri og kakói saman við
Þynnið með vökva þar til kremið verður silkimjúkt

Smyrjið á kökuna þegar hún hefur kólnað (má þó vera aðeins volg) – þá sígur kremið aðeins ofan í og verður sérstaklega ljúffengt.

Skreyting
Stráið kókosmjöli yfir
Ferskir ávextir eða nammi eftir smekk.

Þetta er svona kaka sem klikkar aldrei – einföld, rakamikil og með djúpu súkkulaðibragði. Fullkomin með góðum kaffibolla og enn betri í góðum félagsskap.

Fleira áhugavert:

— Grafinn lax og graflaxsósa — Rabarbarasulta — Sítrónu linguine Nigellu — Múffur með eplum og haframjöli — Döðlukonfekt, gott, gott — Humarveisla Önnu Rósu  — Forsetaísinn —