Baunasúpa
Sjálfum finnst mér þægilegast að notast við moðsuðu á baunasúpa. Þá er allt sett í pottinn, suðan látin koma upp og síðan er slökkt undir og potturinn einangraður með handklæðum og svuntum og látinn standa þannig í nokkra klukkutíma. Sama aðferð og ég nota við hrísgrjónagrautinn.
Ekki fara af taugum þó þið gleymið að leggja baunirnar í bleyti, þess þarf ekkert endilega en það styttir suðutímann.
.
— SÚPUR — BAUNIR — SALTKJÖTOGBAUNIRTÚKALL — BAUNASÚPUR —
.
Baunasúpa
500 g gular baunir
1 dl blaðlaukur
5-6 gulrætur
1 gulrófa
1/2 chili
1/2 tsk timían
3-4 sneiðar beikon
ca 2 l. vatn
salt og pipar
Skolið baunirnar og setjið í pott. Skerið niður blaðlauk, gulrætur, rófur og chili og bætið saman við ásamt beikoni og timían. Hellið vatni yfir svo fljóti vel yfir. Látið suðuna koma upp, fleytið sorann (froðuna) ofan af. Slökkvið undir og setjið svuntur og handklæði yfir pottinn. Látið standa í 2-3 klst. Salti og piprið ef þarf og bætið við vatni ef þarf.
Sprengidagur
Sprengidagur, sem alltaf ber upp á þriðjudegi fyrir öskudag, er síðasti dagurinn fyrir föstuna samkvæmt kaþólskri hefð. Nafnið vísar til þess að fólk átti að borða vel og „springa“ áður en fastan hófst. Íslendingar hafa haldið í þá hefð að borða saltkjöt og baunir þennan dag, en upprunalega var þetta matur alþýðunnar sem síðar varð að föstum hluta sprengidagsins.
Hefðbundin útgáfa af réttinum er saltkjöt – oft lambakjöt en stundum svínakjöt – sem soðið er með gulrófum og kartöflum og borið fram með gulum baunum, sem hafa verið lagðar í bleyti og síðan soðnar. Sumir bæta við rótargrænmeti eða setja sinnep og edik á baunirnar. Á síðari árum hefur einnig komið fram léttari útgáfa með minna söltuðu kjöti eða jafnvel grænmetisútgáfur þar sem reykt grænmeti eða sveppir eru notaðir til að líkja eftir bragðinu.
.
— SÚPUR — BAUNIR — SALTKJÖTOGBAUNIRTÚKALL — BAUNASÚPUR —
.
