Mokka- og karamellukaka

Mokka- og karamellukaka

Eins og áður hefur komið hér fram skiptumst við á að koma með kaffimeðlæti í tíukaffinu á föstudögum – það þarf varla að taka það fram að þessar stundir eru algerlega ómissandi. Björk kom með þessa dásamlegu tertu, uppskriftin birtist í Gestgjafanum fyrir nokkrum árum. Annars er Björk á barmi landsfrægðar vegna baksturssnilldar sinnar og við félagar gerum okkur far um að njóta veitinga hennar reglulega.

— BJÖRK JÓNSD — FÖSTUDAGSKAFFI — LISTAHÁSKÓLINN — KARAMELLU… — MOKKA —

.

Mokka- og karamellukaka

150 g sykur
200 g smjör, mjúkt
4 egg
225 g hveiti
2 tsk lyftiduft
100 g suðusúkkulaði.

Hitið ofninn í 180°C, þeytið sykur og smjör saman þar til blandan er létt og kremkennd.
Bætið eggjum útí einu í senn og hrærið vel á milli.
Blandið hveiti og lyftidufti saman við.
Bræðið suðusúkkulaði yfir vatnsbaði eða í örbylgjuofni og hrærið saman við deigið.
Smyrjið þrjú tertubotnaform (gott að hafa 24 cm svo kremið verði ekki of þykkt) og skiptið deiginu í þau. Bakið í 15 mín. Látið kólna á grind.

Karamellukrem:
100 g smjör, mjúkt
100 g flórsykur
3 msk Royal-karamellubúðingsduft
heitt vatn

Þeytið smjör, flórsykur og búðingsduft mjög vel saman.
Bætið heitu vatni smám saman út í þar til kremið er orðið hæfilega þykkt og samfellt.

Mokkakrem:
100 g smjör, mjúkt
100 g flórsykur
1 msk skyndikaffi
heitt vatn

Þeytið smjör, flórsykur og skyndikaffi vel saman, bætið heitu vatni smám saman útí þar til kremið er orðið hæfilega þykkt og samfellt

Súkkulaðibráð:
150 g dökkt súkkulaði 56%
3 msk rjómi

Hitið súkkulaði og rjómann saman þar til súkkulaðið hefur bráðnað alveg og blandan samfelld og glansandi.

Samsetning:
Karamellukremið fer ofaná fyrsta botninn, leggið annan kökubotninn yfir og jafnið mokkakreminu ofan á.
Setjið loks þriðja botninn ofaná og hellið súkkulaðibráðinni þar ofaná.
Skreytið með berjum og svo bragðast kakan sérstaklega vel með léttþeyttum rjóma.

— BJÖRK JÓNSD — FÖSTUDAGSKAFFI — LISTAHÁSKÓLINN — KARAMELLU… — MOKKA —

.