BJARTEYJARSANDUR. Það er ævintýri líkast að koma heim að Bjarteyjarsandi í Hvalfirði. Margir tengja hann við heimsóknir skólabarna en þangað koma á hverju vori ungmenni alls staðar að af landinu og upplifa sveitastemningu, fara í fjöruferð og borða nesti.
Þar er hins vegar margt um að vera fyrir alla aldurshópa. Tjaldstæði eru í boði og börn geta fengið leiðsögn um bústofninn, landnámshænur, geitur, kindur og leggja á hest og láta teyma sig á honum. Heitur pottur er í fjöru og hægt að fara í sjósund. Þar er stórt fjárbú og stefnan er sú að allt sem í boði er á veitingastaðnum sé af búinu.
Þar er sannkallað matarhandverk stundað og margir þekkja vörurnar af matarmarkaðnum í Hörpu, þau eru t.d. Íslandsmeistarar í súrsuðum radísum, bláberjahangikjötið er ómótstæðislegt, fífladrykkurinn er hressandi, sulturnar eru ljúffengar o.s.frv.
Ekki síst er upplagt fyrir hópa, t.d. ættarmót, samstarfsfólk, saumaklúbba, (allt að 60 manns) að panta sér geggjaða grillveislu, en opið er kl. 11-17 í smárétti fyrir ferðafólk.
Hjónin Arnheiður Hjörleifsdóttir og Guðmundur Sigurjónsson reka myndarbú í samvinnu við foreldra Guðmundar. Þau eru með um 600 ær, hesta, íslenskar hænur, geitur og kanínur. Tekið er á móti hópum og haldnar veislur „Vinsælastar eru grillveislurnar en ætli kjötsúpan sé ekki vinsæl hjá göngufólki, já og grænmetissúpan hjá þeim sem hana kjósa frekar,” segir búkonan Arnheiður. Tvær vinsælar gönguleiðir eru stutt frá; Leggjabrjótur og Síldarmannagötur.
– HVALFJÖRÐUR — BJARTEYJARSANDUR — FERÐAST UM ÍSLAND –
Við ferðaþríeykið viljum gjarnan heyra frá ferðaþjónustufólki
