Paprikáscsirke og Nokedli – Ungversk veisla
Á Ísafirði höfum við kynnst mörgu skemmtilegu áhugafólki um matargerð. Þar á meðal er Beáta Joó píanókennari með meiru, sem hefur sannarlega auðgað tónlistarlífið sl. 35 ár, t.d. sem kór- og hljómsveitarstjóri í stærri verkum, auk þess að fóstra af einstakri alúð hundruð píanónemenda, sem sum hver hafa orðið áberandi listamenn þjóðarinnar.
En þrátt fyrir að vera orðin íslenskari en margir Íslendingar, er hún hreykin af því að vera Ungverji og þegar við uppgötvuðum að orðið nokedli væri áreiðanlega skylt núðlum, noodles, Nudeln, svaraði hún því til að það væri öruggt, enda kæmi allt gott frá Ungverjum. Það er óborganlegt að hlæja með Beötu, enda kann hún þá list að gera mest grín að sjálfri sér.
— BEÁTA — UNGVERJALAND — KJÚKLINGUR — GÚRKUSALÖT — ÍSAFJÖRÐUR — BÚDAPEST — BERGÞÓR —
.
Beáta bauð í ungverskt matarboð og útbjó þekktan heimilisrétt, notalegan og gómsætan paprikukjúkling, með Nokedli, sem eru eins konar handgerðar hveitiskrúfur.
Paprika er einkennandi fyrir ungverska matargerð, enda er orðið komið úr ungversku.
Beáta tekur alltaf með sér paprikuduft frá Ungverjalandi, enda í samböndum við ræktanda, en vissulega er hægt að finna sæmilega papriku í betri búðum hér. Endilega prófið á kósí fjölskyldukvöldi!
PAPRIKÁSCSIRKE
2 laukar
mikið af olíu eða svínafitu (amk 2 dl)
Kjúklingabringa (gott að nota læri líka út af beinunum)
2-3 msk paprikuduft (má ekki brenna)
smá vatn og salt
1 ds sýrður rjómi (haldið eftir smá til að setja út á í lokin).
Hitið olíu/svínafitu á pönnu, steikið laukinn í svolitla stund. Bætið kjúklingabitum út í og steikið við lágan hita, þar til safinn er að byrja að renna úr þeim. Stráið þá paprikuduftinu yfir og hitið áfram, en ekki lengi því að annars brennur paprikan. Saltið og setjið um 1 dl af vatni út í og sjóðið í um 20 mín. (miðað við beinlausa bringu). Í lokin er sýrður rjómi settur út í, þarf ekki að sjóða eftir það.
Ef maður vill þykkari sósu, má blanda rjómann með svolitlu hveiti, en þá þarf að sjóða aðeins áfram.
Skreytið með sýrðum rjóma og steinselju.
Nokedli
5 b hveiti
3 egg
smá salt
smá vatn
Hrærið allt með grófum handþeytara. Deigið verður að vera stífara en pönnukökudeig, en samt á að vera hægt að smyrja því í gegnum góft gatasigti út í sjóðandi saltvatn.
Sjóðið í 3 mínútur, takið þá úr pottinum og rúllið í smá smjöri eða olíu til þess að núðlurnar festist ekki saman.
Gúrkusalat
2 gúrkur
1 dl vatn
1 msk sykur
2 msk edikssýra
4-5 rifin hvítlauksrif
1 dós sýrður rjómi
Sneiðið gúrku t.d. með ostaskera og saltið svolítið með Himalaya salti. Látið bíða í u.þ.b. 10 mín og setjið síðan allt annað út í.
.
— BEÁTA — UNGVERJALAND — KJÚKLINGUR — ÍSAFJÖRÐUR — BÚDAPEST — BERGÞÓR —
.
