Bryggjuhúsið
Ýmir Björgvin og Hrefna Ósk voru að opna veitingastaðinn Bryggjuhúsið, í hinu sögufræga húsi á Vesturgötu 2 þar sem Kaffi Reykjavík var til húsa á árum áður, en þar áður hét húsið einmitt Bryggjuhúsið! Þau hafa staðið á haus síðan í fyrra við að gera húsið fallegt á ný og færa það í upprunalegt form og hafa gjörsamlega farið hamförum. M.a. brugðu þau sér til Slóvakíu og Afríku að kaupa innanstokksmuni. Það er eitthvað ferskt, létt og yndislegt við að koma inn á staðinn núna með hlýlegheitum, fallegum húsgögnum og litum og ekki spilla myndir ungra myndlistarmanna úr safni Skúla Gunnlaugssonar.
— VEITINGASTAÐIR — ÍSLAND — ÍSLENSKT — ELÍSA —
.
Í húsinu eru margar vistarverur, hver salurinn á fætur öðrum er að fá andlitslyftingu og þarna geta margar veislur verið í gangi á sama tíma. Hægt að bjóða ferðamönnum upp á smakkferðalag í Vínhöllinni og í töff rými niðri með ævintýralega fallegri lýsingu, en Ýmir og Hrefna voru einmitt frumkvöðlar í að fara í „gourmet tours“ með ferðamenn.
Hér er hægt að fá brauðtertur, gamaldags sunnudagsmat eins og hjá ömmu, en líka pitsur og alls konar sælkerarétti og verði er stillt í hóf.
Hér er óvenjulegt að geta talað íslensku við næstum allt starfsfólkið. Það verður nú að viðurkennast að það er svolítið eins og að komast heim til sín. Það er auðvitað ekki hlaupið að því að ráða íslenskumælandi starfsfólk, en hér hefur það tekist með miklum ágætum.
Ómar Stefánsson kokkur reiddi fram hvern réttinn á fætur öðrum. Fyrst fengum við hörpuskel með fetaosta-kremi, ristuðum möndlum og „compressed“ vatnsmelóna (söltuð til að taka vökvann úr, pakkað inn), með grænum eplum, jurtum og kampavíns-vinaigraitte
Svo fórum við í svolitla nostalgíuferð, fengum okkur nætursaltaðan þorskhnakka með mjúkum lauk í smjöri, stökkum kartöflum, hollandaise og graslauk. Þetta var sælgæti. Í boði var einnig há-nostalgískur réttur, grillað lambalæri með rauðkáli, grænum baunum, sykurbrúnuðum kartöflum og rabarbarasultu, bara eins og hjá ömmu, á 4.400 kall. Verði er sem sagt stillt í hóf á þessum stað.
.
— VEITINGASTAÐIR — ÍSLAND — ÍSLENSKT — ELÍSA —
.