Torrone
Bergþór skellti sér í Háskólann í haust í BA í ítölsku með hinum krökkunum (!) og síðan hefur verið fengist við ýmislegt Ítalíu-tengt á heimilinu, m.a. matreiðslu, nú síðast nammið víðfræga Torrone, sem má segja að sé eins konar óbakaður marengs úr eggjahvítum og hunangi með möndlum og hnetum. Svolítið dedú, en tókst í annarri tilraun, mikilvægt er að nota hitamæli. Hrísgrjónapappír fæst t.d. í Asia Market í Skeifunni.
Torrone á rætur sínar að rekja til Cremona á Norður-Ítalíu og er fyrst getið árið 1441, þegar það var búið til í tilefni brúðkaups Francesco Sforza og Bianca Maria Visconti. Sælgætið var mótað til að líkjast Torrazzo-turninum, helsta kennileiti borgarinnar. Torrone er gert úr hunangi, eggjahvítum og hnetum og hefur í aldaraðir verið órjúfanlegur hluti af ítölsku jólahaldi. Nafnið tengist annað hvort latneska orðinu torrēre – að rista – eða orðinu torre, turn.
— ÍTALÍA — MARENGS — PISTASÍUR — MÖNDLUR —
.
Torrone
220 g möndlur
180 g pistasíur
340 g hunang
250 g sykur
2 stórar eggjahvítur við herbergishita
salt milli fingra
1 msk fínt rifinn sítrónubörkur
2 tsk vanilla
Hrísgrjónapappír
Setjið bökunarpappír í form u.þ.b. 15 x 24 cm (festist með bökunar-sprayi eða vatni), tvö blöð, annað kemur upp úr í aðra áttina og hitt kemur upp úr í hina áttina, sjá mynd.
Nú þarf að hafa allt tilbúið, hnetur og pistasíur í ofnskúffu, eggjahvítur í hrærivélinni og hunang/sykur í potti. Gera síðan þrennt í einu:
Ristið hnetur og pistasíur í einföldu lagi í ofni við 180º C í um 10 mín. Látið vera í ofninum, svo að þær haldist heitar.
Bræðið hunang og sykur við lágan hita, hrærið í með tréspaða, látið sjóða þar til hitamælir sýnir 145°C.
Þeytið hvíturnar með salti og vanillusykri á meðan, þar til þær eru léttar eins og dúnn.
Hellið hunanginu í stálkönnu (eða sjóðandi heita postulínskönnu) og hellið í mjórri bunu í hvíturnar á litlum hraða og þeytið áfram í 6-8 mín. á meiri hraða, eða þar til blandan lítur út eins og marens.
Bætið heitum hnetum og pistasíum og sítrónuberki út í og hrærið þar til allt er vel blandað.
Þekið formið með hrísgrjónapappír, sem búið er að bleyta í 5 sek í heitu vatni, ofan á bökunarpappírinn glanshlið niður, hellið deiginu í formið. Þekið yfirborðið með öðru lagi af hrísgrjónapappír, glanshlið upp og leggið eitthvað ofan á, t.d. lítinn bakka, svo að pappírinn verpist ekki.
Kælið í nokkrar klukkustundir. Takið upp úr forminu og takið bökunarpappírinn undan. Skerið með beittum hníf.
— ÍTALÍA — MARENGS — PISTASÍUR — MÖNDLUR —
.