Grilluð glútenlaus pitsa
Einu sinni var keyptur pitsu-ofn á heimilið. Það voru kjarakaup, því að hann var gjörnýttur, stundum nokkrum sinnum í viku, þangað til hann gaf upp öndina. Síðan hefur pitsan farið í bakaraofninn, m.a.s. var sérskorinn steinn í steinsmiðju. En Kjartan Örn grillar allt, m.a.s. pitsur. Í grillveislu hjá honum, fengum við glútenlausar pitsur af ýmsu tagi. Vitaskuld eru pitsu-uppskriftir oft hernaðarleyndarmál, enda jafn mismunandi og heimilin eru mörg. Hver og einn getur notað sína uppskrift þegar pitsan er grilluð, en þeir sem vilja prófa glútenlausar pitsur verða ekki sviknir af þessum, því að Kjartan hefur þróað þær á veröndinni sinni í nokkra áratugi.
— PITSUR — KJARTAN ÖRN — GLÚTENLAUST —
.
Grilluð glútenlaus pitsa
500 glútenlaust hveiti
5 msk góð matarolía
1 msk hunang
2 tsk þurrger
250 ml volgt vatn
1 tsk salt
Blandið saman vatni geri og hunangi í matvinnsluvél. Bætið matarolíu, salti og hveiti út í blönduna. Hnoðið saman.
Fletjið deigið út á grillplötu/grillstein og látið það taka sig á rólegum stað í u.þ.b. 15 mínútur.
Setjið pitsusósuna á botninn og lítið eitt af rifnum osti. Grillið á pitsuplötu á „óbeinu“ grilli í u.þ.b. 12-15 mínútur, en ef pitsan er á steini, er áreiðanlega ekkert mál að grilla hana á venjulegu grilli.
Pitsa A: Hawai. Skinka, ananas, smátt skorinn laukur og ostur yfir.
Pitsa B: Skinka, paprika, sveppir, laukur, ananas, smátt skorið pepperóni og ostur yfir.
Pitsa C: Pizza salami con cinquanta formaggi. Salami og úrval góðra osta.
Pitsa D: Pizza Margherita grilluð á grillinu. Um leið og hún er tekin af er sett á hana parmaskinka, ferskt klettasalat (ruccola) og rifinn parmesan ostur yfir.
.
.
