Don Giovanni terta
Ætla má að Margrét Eggertsdóttir söngkona hafi verið ókrýnd tertudrottning Íslands á sinni tíð. Uppskriftir voru henni lítt nauðsynlegar; hún bar í kolli sínum hafsjó af þekkingu, reynslu og innsæi. Margir báðu hana um uppskriftir, en hún svaraði oft með bros á vör og bauðst frekar til að mæta sjálf með tertu í veisluna. Að hennar sögn var slíkt lítið mál – þetta mætti gera „með vinstri hendina út um gluggann“. Glens og góðlátlegur húmor var aldrei langt undan þegar Margrét var annars vegar.
Þessi terta, kennd við Don Giovanni, er einmitt úr fórum Margrétar. Hún var bökuð á dögunum fyrir æfingu fjögurra óperusöngvara sem hafa stofnað með sér kvartett og æft af krafti í sumar.
Ópera Mozarts, Don Giovanni var frumsýnd í Estates leikhúsinu í Prag í október 1787.
— MARGRÉT EGGERTSDÓTTIR — SÆTABRAUÐSDRENGIRNIR — TERTUR — GRAND MARNIER — AUSTURRÍKI —
.
Don Giovanni terta
Botn:
250 g marsipan, við stofuhita
250 g sykur
250 g smjör
3 egg
100 g hveiti
1/2 tsk salt.
Þeytið saman marsípan, sykur og smjör þar til massinn er ljós og léttur. Þeytið eggin saman og blandið þeim varlega saman við ásamt sigtuðu hveiti og salti, með sleif.
Bakið í tveimur formum við 150°C í um 40–60 mínútur, eða þar til botnarnir eru fullbakaðir.
Krem:
2 stór matarlímsblöð
3 eggjarauður
2 msk sykur
3 msk Grand Marnier
1 peli rjómi.
Leggið matarlímsblöðin í bleyti, kreistið úr þeim vatnið og bræðið yfir vatnsbaði.
Þeytið eggjarauðurnar með sykri þar til þær verða ljósar og léttar. Bætið líkjörnum út í, síðan þeyttum rjómanum og að lokum bræddu matarlíminu.
Setjið annan botninn á tertudisk. Skerið hring í miðjuna á hinum botninum, um 10 cm í þvermál, áður en hann er lagður ofan á. Setjið kremið í holuna og dreifið einnig yfir tertuna.
Skreytið með berjum og litfögrum ávöxtum sem til eru, til dæmis mangó, jarðarberjum, vínberjum, bláberjum, ferskjum, hindberjum, kíví eða brómberjum. Fallegt er að miða við fjóra liti – gult, rautt, grænt og blátt. Ef bananar eru notaðir er gott að væta þá með sítrónusafa svo þeir dökkni ekki.
Geymið tertuna í ísskáp í um eina klukkustund á meðan frómasinn stífnar.
.
— MARGRÉT EGGERTSDÓTTIR — SÆTABRAUÐSDRENGIRNIR — TERTUR — GRAND MARNIER — AUSTURRÍKI —
.