Róandi kryddkakan hennar Söru
Ævintýrakonan Sara Hrund Signýjardóttir býr og starfar á Suðureyri við Súgandafjörð. Hún á það til að bruna eldsnemma til Ísafjarðar og synda þúsund metra áður en dagurinn hefst fyrir alvöru.
Eitt sinn kom Sara með nýbakaða, ilmandi kryddköku á kennarafund. Hún sagðist baka þessa köku þegar hún þyrfti ró og jafnvægi. Þess vegna lá beinast við að kalla hana Róandi kryddkökuna hennar Söru.
Kakan er mjúk, krydduð og heimilisleg — akkúrat svona kaka sem passar vel með kaffi, góðu viðbiti og notalegri stund.
— KRYDDBRAUÐ — SUÐUREYRI — BRAUÐ — KAFFIMEÐLÆTI —
.
Róandi kryddkakan hennar Söru
2 egg
2 dl mjólk
80 g smjör, brætt
100 g sykur
100 g púðursykur
2 tsk matarsódi
240 g hveiti
3/4 tsk kanill
3/4 tsk negull
hnífsoddur engifer
Pískið saman egg og mjólk. Bætið bræddu smjöri saman við.
Blandið þurrefnunum saman í annarri skál. Hellið vökvanum út í og hrærið rólega með sleif — helst með bros á vör og í góðu andlegu jafnvægi.
Þegar deigið er orðið kekkjalaust er því hellt í ílangt form. Bakið við 180°C í 40–45 mínútur.
Berið fram með vænni klípu af góðu viðbiti.
Fleira áhugavert:
-— Kókosterta — Brún lagkaka — Rúgmjölspartar — Ásta Snædís býður í kaffi — Hægeldaðir lambaskankar — Steiktur fiskur í brúnni sósu og ávaxtagrautur með rjóma — Merkingar á hlaðborðum –