Rabarbari með kókosbollum
Rabarbari er eitt af því besta sem íslenska sumarið hefur upp á að bjóða og hér fær hann heldur betur hátíðlega meðferð. Í þessari skemmtilegu uppskrift sameinast rabarbari, mjúkar kókosbollur, stökkar salthnetur og karamellukeimur í ómótstæðilegum eftirrétti sem vekur athygli við hvert kaffiborð. Þetta er einfaldur en óvenjulegur réttur sem kemur skemmtilega á óvart og hentar jafnt sem eftirréttur eða með sunnudagskaffinu.
— RABARBARI — KÓKOSBOLLUR — SALTHNETUR —
.
Rabarbari með kókosbollum
ca 5 dl rabarbari skorinn í bita
5 msk sykur
1 dl rjómi
4 msk vatn
1 tsk vanilla
1 dl Ritz kex, mulið gróft
1 dl salthnetur
4-6 kókosbollur
Bræðið sykurinn í potti þar til hann verður ljós karamellulitaður. Takið pottinn af hitanum og hrærið rjóma, vatni og vanillu saman við. Setjið aftur á vægan hita og bætið rabarbaranum út í. Látið malla í um 5 mínútur þar til rabarbarinn byrjar að mýkjast en heldur þó lögun sinni.
Setjið í meðalstórt eldfast mót. Stráið muldu Ritzkexi og salthnetum yfir. Skerið kókosbollurnar langsum og leggið þær yfir með skurðflötinn upp.
Bakið við 155°C í 25–30 mínútur, eða þar til kókosbollurnar hafa fengið fallegan ljósbrúnan lit.
Berið fram heitt, eitt sér eða með þeyttum rjóma eða vanilluís.
Fleira áhugavert:
— Bruschettur – Brúskettur — Hvernig fáum við hvítar skyrtur til að vera hvítar? — Kókosterta — Brún lagkaka — Rúgmjölspartar — Hægeldaðir lambaskankar — Steiktur fiskur í brúnni sósu og ávaxtagrautur með rjóma — Saltfiskur í ólífuolíu — Póstlistinn — Hægeldaðir lambaskankar —