Portóbellósveppir í smjördeigi
Hér er afbrigði af Wellington steik, sem ég fann á netinu og útfærði. Beef Wellington er nautalund í smjördeigi, en í tilefni af veganúar eru Portobelló sveppir notaðir í staðinn fyrir naut.
.
.
Wellington sveppir
4 Portobello sveppir
1 pakki smjördeig
1 glas af þurrkuðum shiitake sveppum
10 sveppir
2 b spínat
5 skalottulaukar
4 hvítlauksgeirar
3 greinar ferskt estragon
Earth balance smjör
¼ b grænmetissoð
Skafið svörtu fanirnar burt undir hattinum á Portobello sveppunum og bakið þá á bökunarpappír í 10 mín.
Farið eftir leiðbeiningum um shiitake sveppi. Þegar þeir eru tilbúnir, skellið þeim í matvinnsluvél ásamt spínati, sveppum, estragoni, smátt skornum skalottulauk og hvítlauk. Steikið blönduna í Earth balance smjöri. Hellið grænmetissoði yfir og látið malla í 10 mín. Piprið.
Fyllið Portobello sveppina með sveppamaukinu af pönnunni, í rýmið sem myndaðist þegar fanirnar voru skafnar af. Fletjið út 1 smjördeigsplötu fyrir hvern Portobello svepp og pakkið þeim síðan inn í deigið. Bakið við 225°C í 25 mín., setjið í lokin undir grillið í skamma stund og fylgist vel með því að deigið verði fallega brúnt, en brenni ekki.
Hefðbundið meðlæti, t.d. kartöflur í ofni með timian, grófu salti og hvítlauksolíu eða smátt skornar gulrætur steiktar í Earth balance smjöri ásamt steinselju og grófu salti.
Rauðvínssósa:
1 b rauðvín
2 b grænmetissoð
2 tsk döðlusíróp
2 msk maizena
svartur pipar
Látið rauðvín og grænmetissoð malla í potti í 20 mín. Hellið döðlusírópi út í (ef það fæst ekki má nota annað síróp eða búa til, uppskriftir á netinu). Hrærið maizena út í svolitlu köldu vatni og þykkið sósuna. Látið bíða og hitið upp þegar sveppirnir eru bornir fram. Yfirleitt fæst allt efnið í Hagkaupum eða öðrum betri matvöruverslunum.
–
— PORTOBELLOSVEPPIR Í SMJÖRDEIGI —
–
