Eru börnin boðin líka?
Alloft er börnum ekki boðið í brúðkaup eða stór afmæli, einkum þegar um er að ræða fullorðinsboð þar sem vín er haft um hönd. Í slíkum tilvikum er almennt gert ráð fyrir að boðið sé ætlað fullorðnum einum, nema annað sé sérstaklega tekið fram.
— GIFTING — BORÐSIÐIR/KURTEISI — BOÐSKORT —
.
Ef nöfn fullorðinna og barna eru skráð á boðskortið eða í tölvupóstinn, er málið skýrt: börnunum er boðið. Ef aðeins nöfn fullorðinna koma fram, er jafnskýrt að boðið nær ekki til barnanna. Standi engin nöfn á boðskortinu sjálfu, er ágæt regla að miða við það sem stendur á umslaginu. Reynslan sýnir nefnilega að þegar líður á undirbúninginn getur auðveldlega gleymst hvernig boðið var orðað – sérstaklega þegar umslagið er löngu horfið í Sorpu.
Á dögunum heyrði ég af boðskorti í brúðkaup þar sem meðal annars stóð: „Setjið börnin í pössun og pússið dansskóna.“ Skýr skilaboð, sett fram með léttum og hlýlegum hætti.
Auðvitað eru börnin okkar flest vel upp alin, prúð og yndisleg. En við tökum ekki ráðin í okkar hendur. Í fullorðinsveislum fara oft af stað samræður, brandarar og stemning sem einfaldlega er ekki ætluð börnum. Það er hvorki vanvirðing né útilokun, heldur einfaldlega spurning um eðli boðsins.
Gerum því ekki mál úr þessu og móðgumst alls ekki þótt börnunum sé ekki boðið með. Svörum boðinu kurteislega, hringjum í barnapíuna, klæðum okkur upp, gerum okkur glaðan dag – og njótum þess að vera boðin í veislu sem er ætluð fullorðnum.
— GIFTING — BORÐSIÐIR/KURTEISI — BOÐSKORT —
.