Kínósaalat með kóríander og lime.
Létt og ferskt salat sem getur bæði verið sér réttur eða frábært meðlæti með fiski, grilluðu grænmeti eða baunaréttum. Þetta er salat sem hentar vel í hádegismat, í nestisboxið eða á hlaðborð.
Kínóa (quinoa) hefur á síðustu árum orðið vinsælt hráefni víða um heim, en á rætur sínar að rekja til Suður-Ameríku, einkum í Andesfjöllum í Perú og Bólivíu. Þar var það ræktað fyrir þúsundum ára og kallað „móðurkorn“ Inkanna. Þrátt fyrir að vera oft nefnt korn er kínóa í raun fræ.
Það sem gerir kínóa sérstakt:
– prótínríkt og inniheldur allar níu lífsnauðsynlegu amínósýrurnar
– inniheldur trefjar
– góð uppspretta járns, sinks og magnesíums
– inniheldur B-vítamín
– glúteinlaust
Í 100 g af soðnu kínóa eru um það bil: 120 hitaeiningar, 4 g prótín, 2 g trefjar, 21 g kolvetni og lítið af fitu
Kínóa er létt í maga og mettar vel – hráefni sem við mættum sannarlega nota oftar í daglegri matargerð.
Limesafinn og fersk kóríander gerir þetta salat einstaklega sumarlegt og ilmandi.
.
Kínósaalat með kóríander og lime
1 1/2 bolli kínóa
3 b vatn
4 tómatar
2 paprikur
1/2 búnt kóríander
1/4 rauðlaukur
1 hvítlauksrif, saxað smátt
safi úr 1 lime
1/3 tsk grænmetiskraftur
salt og pipar.
Setjið kínóa í sigti og skolið vel undir köldu rennandi vatni. Það fjarlægir náttúrulegt beiskt yfirborðslag (saponín).
Setjið kínóa í pott ásamt vatni og sjóðið í um 15–20 mínútur eða þar til vatnið hefur sogast upp. Slökkvið undir og látið standa með loki í 5 mínútur. Hrærið lauslega í með gaffli og látið kólna.
Skerið tómata í báta, papriku í bita, saxið kóríander og rauðlauk smátt.
Blandið öllu saman við kínóa. Kreystið ferskan limesafa yfir og kryddið með grænmetiskrafti, salti og pipar.
Látið salatið standa í um klukkustund svo bragðið nái að blandast vel.
Hugmyndir að tilbrigðum:
Bæta við svörtum baunum eða kjúklingabaunum.
Setja granateplakjarna yfir.
Smá ólífuolía til að mýkja áferð
Avókadó rétt áður en borið er fram.
Þetta passar líka einstaklega vel með indverskum og miðjarðarhafsréttum.
.