Rabarbaraskyr með lakkrís
Björg Þórsdóttir bauð í steiktan þorsk í kókosraspi með eplum og banönum um daginn og var með ótrúlega góðan skyrrétt á eftir með hrálakkrísdufti sem hún stráði yfir.
„Mamma kom heim með þetta lakkrís duft frá Ninu, danskri frænku minni fyrir nokkrum árum síðan. Nina hafði boðið upp á gúrkusneiðar með lakkrís með kampavíni í fordrykk. Þetta hef ég nokkrum sinnum gert eftir henni og það vekur ávallt mikla lukku.
Svo er himneskt að sáldra svolitlu lakkrísdufti yfir þunnar eplasneiðar, já eða popp þegar mann langar í eitthvað sætt. Svo er það líka mjög gott út á ís. En síðast bætti ég lakkrisdufti í fimmkrydda blöndu þegar ég eldaði andabringur.
Möguleikarnir eru óteljandi.” segir listakokkurinn Björg
— #2017Gestabloggari9/52 — SKYR — RABARBARI — BJÖRG ÞÓRSDÓTTIR —
.
Rabarbaraskyr með lakkrís
1 dós skyr, óhrært (400g)
1 tsk vanilluduft
50 g sykur
mjólk
400 g rabarbari
100 g sykur (jafnvel minna!)
1 lime, safi og smávegis börkur
nokkur bláber, til að fá rauða litinn.
Hrálakkrísduft frá Johan Bülow (fæst í Epal)
Rabarbarinn og bláberin er soðinn með sykrinum í potti með þykkum botni í nokkrar mínútur. Þá er lime-safanum og berkinum bætt út í og soðið í mínútu í viðbót eða svo. Sett í hreina krukku. Geymist í ísskáp í nokkra daga. Þessi sulta er líka góð til að bragðbæta ab-mjólk og chia búðinga.
Skyrið er hrært samkvæmt venju með mjólk og sykri og vanillu bætt við. Vegna þess hve vanillan er sæt og rabarbarasultan er borin fram með skyrinu, má minnka sykurinn talsvert.
Skyrið er sett í skál og rabarbarasultan ofan á. Svolitlu af lakkrísdufti sáldrað yfir. Borið fram strax.
„Lakkrísduftið frá Johan Bülow fæst bæði gróft og fínt og er agalega gott á næstum allt! Hugmyndin af réttinum kemur úr uppskriftabókinni hans, en var ekki fylgt nákvæmlega.”
— #2017Gestabloggari9/52 — SKYR — RABARBARI — BJÖRG ÞÓRSDÓTTIR —
—
