Rabbar-barinn á Hlemmi mathöll. Bryndís Sveinsdóttir eigandi tók á móti mér með brosi á vör. Á hverjum morgni fær hún ferskt grænmeti frá íslenskum bændum. Hjá henni er hægt að fá þrjár tegundir af súpum daglega sem framreiddar eru í umhverfisvænum umbúðum. Á næstunni byrjar Bryndís að bjóða upp á grænmetissamlokur, grænmetisþeytinga og vegansúpu. Auk alls þessa er hægt að fá undurgóðar grillaðar humarsamlokur með basildressingu, beikoni og grænmeti. Dásemd samlokanna spyrst hratt út og þann stutta tíma sem ég staldraði við á Rabbar-barnum komu tveir eða þrír starfsmenn í húsinu til að fá samlokurnar góðu.
Hollasti bar á Íslandi. Á hverjum morgni fær Bryndís sendingu af fersku grænmeti
Bryndís naut aðstoðar fjölskyldu og vina við undirbúninginn. Pabbi hennar smíðaði innréttingarnar, stór hluti þeirra er úr vörubrettum.
Á Rabbar-barnum eru afurðir frá Friðheimum. Þetta mun vera eini staðurinn fyrir utan framleiðslustaðinn sem vörurnar þeirra eru seldar.
Kartöflusmælki er hreinasta lostæti. Ég fékk poka af smælki, hálfsauð, skar í tvennt og steikti í olíu ásamt rósmaríni, hvítlauk, salti og pipar. Mjög mjög gott.
Í austurhluta Hlemms eru borð og bekkir, þar geta gestir sest niður og borðað góðgætið af stöðunum. Bryndís sér um kryddjurtirnar á borðunum sem bæði eru til skrauts og líka fyrir viðskiptavini til að krydda matinn sinn.
