Brunch á VOX Uppáhalds „brunchinn“ okkar er á VOX á Nordica. Þangað höfum við farið af og til í gegnum tíðina og alltaf verið ánægðir. Maturinn er á gríðarstóru hlaðborði með næstum því óteljandi tegundum – allt fallega framsett. Fyrst er farið í forréttina, þá í heita aðalrétti sem matreiðslumennirnir skera niður og loks í eftirréttina. Myndirnar tala eiginlega sínu máli og segja allt sem segja þarf.
Á sunnudaginn var grillaður nautabógur með rauðvínssósu og lambalæri með Bernaisesósu í aðalrétt. Einnig var hægt að fá djúpsteiktan fisk en því miður gleymdi ég að smakka hann. VOX-fólk mætti hugsa meira um veganista, sem fjölgar óðum, og bjóða upp á hnetusteik með aðalréttunum. Þá væri þetta fullkomið. Að vísu sé ég á Tripadvisor að veganistar eru mjög ánægðir með brunchinn.
Ekkert fór fram hjá vökulum augum þjónanna sem sáu vel um gestina. Við vorum rétt búin af diskunum þegar þjónarnir komu til að taka diskana.
Fjölbreytt útval – næstum því óteljandi tegundir á hlaðborðinu, bæði aðal- og eftirréttir
Samantekt. Fagmennska fram í fingurgóma, mjög góð þjónusta. Fallega framborinn gæðamatur á gríðarstóru og fjölbreyttu hlaðborði. Highly recommended.
Texti: Albert Eiríksson albert.eiriksson @ gmail . com
Myndir: Bragi Bergþórsson
