SOÐIN BRÚNKAKA („DRULLUKAKA“)
Ágústa Gunnarsdóttir hefur áður komið við sögu HÉR á blogginu. Bergþór kynntist henni á námsárunum í Ameríku og hefur dásamað matreiðsluhæfileika hennar æ síðan, auk óbrigðuls auga fyrir formi, litum og skipan allra hluta í kringum sig.
Stundum birtir hún myndir af girnilegum kökum á fasbókinni. Nú eru voveiflegir tímar og hvað er þá meira upplífgandi en að leita í uppskriftir mömmu sinnar?
Þegar Bergþór sá á fasbókinni þessa „drulluköku“, eins og þær systurnar munu hafa kallað hana, rifjaðist upp fyrir honum, að löngu fyrir tíma netsins tók hann þátt í keðjubréfi sem byggðist á því að senda uppskriftir. Þá kom m.a. bréf frá Hildi, systur Ágústu, sem sendi honum þessa uppskrift frá móður sinni.
Þetta er ein af þessum gamaldags, hlýlegu og heimilislegu tertum og mjög einföld að gera.
.
SOÐIN BRÚNKAKA („DRULLUKAKA“)
2 1/2 dl vatn
200 gr sykur
200 gr smjör
200 gr rúsínur
2 tsk negull
2 tsk kanill
Setjið allt í pott og soðið í 3 mín. Kælið.
Hrærið út í kryddblönduna:
300 gr hveiti
1 tsk lyftiduft
2 tsk natrón
Bakið í 24 cm kökuformi í 50-60 mín. við 150°C í blástursofni.
SÚKKULAÐI GANACHE ofan á: Jafn mikið af súkkulaði og rjóma.
Setjið súkkulaðið í skál, hitið rjómann að suðu (ekki sjóða), hellið í skálina og hrærið. Smyrjið á kökuna.
