Döðlukaka með heitri karamellusósu
„Þessi kaka er alltaf mjög vinsæl hér á heimilinu og ég geri hana mjög gjarnan hvort sem er í kaffiboði eða sem eftirrétt. Í mörg ár hef ég boðið upp á hana á Þorláksmessu fyrir gesti og gangandi“, segir Sigríður Júlía á Hjarðardal Ytri í Önundafirði er við vorum þar í mikilli veislu.
.
— DÖÐLUTERTUR — ÖNUNDARFJÖRÐUR — KARAMELLU — ÞORLÁKSMESSA — ENGLISH —
.
Döðlukaka með heitri karamellusósu
Kakan:
235 g döðlur (2 bollar)
1 tsk matarsódi
120 g mjúkt smjör
5 msk sykur
2 egg
3 dl hveiti
½ tsk salt
½ tsk vanilludropar
1 og 1/3 tsk lyftiduft.
Setjið döðlur í pott og látið vatn fljóta yfir. Látið suðuna koma upp, slökkvið á hitanum og látið döðlumaukið bíða í pottinum í 3 mín. Bætið matarsódanum saman við.
Þeytið smjör og sykur vel saman og bætið eggjunum í, einu í senn. Blandið síðan hveitinu, saltinu og vanilludropunum saman við. Bætið lyftiduftinu út í, ásamt ¼ bolla af döðlumaukinu og hrærið varlega í. Blandið að lokum afganginum af döðlumaukinu út í.
Smyrjið u.þ.b. 8 cm hátt lausbotna form, sem er 24 cm í þvermál, vel með smjöri og setjið deigið í það. Hitið ofninn í 180°C og bakið í 30–40 mínútur eða þar til miðjan er bökuð.
Hvolfið kökunni á tertudisk og berið hana fram volga eða kalda með sósunni og léttþeyttum rjóma. Einnig má skreyta kökuna með döðlum, jarðarberjum eða valhnetum.
Karamellusósan:
120 g smjör
115 g púðursykur (2 dl.)
½ tsk vanilludropar
¼ bolli rjómi
Setjið allt hráefnið saman í pott og látið suðuna koma upp.
.
— DÖÐLUTERTUR — ÖNUNDARFJÖRÐUR — KARAMELLU — ÞORLÁKSMESSA — ENGLISH —
— DÖÐLUKAKA MEÐ HEITRI KARAMELLUSÓSU —
.
