Steiktir þorskhnakkar með Hollandaise sósu
Hjónin Svala Lárusdóttir og Davíð Pitt keyptu fyrir nokkrum árum eitt elsta húsið á Þingeyri við Dýrafjörð og endurgerðu það á glæsilegan hátt svo það er nú orðin sannkölluð bæjarprýði. Húsið þeirra – gamli spítalinn á Þingeyri – var reist árið 1908 og starfrækt sem sjúkrahús í tæpa hálfa öld.
Þar var boðið upp á dýrindis smjörsteikta þorskhnakka sem brögðuðust einstaklega vel. Með þeim voru strengjabaunir, mjúk og létt kartöflumús og silkimjúk Hollandaise-sósa. Smjör og meira smjör 🙂
Yfir borðhaldinu rifjuðum við upp skemmtilega setningu úr kvikmyndinni Last Holiday þar sem Gerard Depardieu segir með sínum þykka franska hreim: “The secret to life is butter.”
Það átti svo sannarlega við þarna.
— ÞINGEYRI — FISKRÉTTIR — DÝRAFJÖRÐUR — ÞORSKUR — FISKUR Í OFNI — HOLLANDAISE —
.
Steiktir þorskhnakkar
Þorskhnökkunum var velt upp úr þeyttu eggi og síðan hveiti. Þeir voru kryddaðir með salti og pipar og steiktir á pönnu í ríkulegu smjöri þar til þeir urðu gullinbrúnir og safaríkir.
Ofan á var settur laukur og paprika sem höfðu verið látin malla rólega í smjöri við lágan hita í dágóða stund, þar til grænmetið varð mjúkt, sætt og ilmandi.
Hollandaise-sósa
5 eggjarauður
250 g smjör, brætt
u.þ.b. 1 msk sítrónusafi
salt og pipar
Setjið eggjarauðurnar í hitaþolið ílát og setjið það yfir pott með heitu vatni (vatnsbað). Vatnið á að ná að suðumarki en alls ekki að bullsjóða.
Pískið stöðugt og gætið vel að hitanum. Hellið brædda smjörinu hægt og rólega saman við í mjórri bunu á meðan þið pískið. Þegar allt smjörið hefur blandast við skal halda áfram að píska þar til sósan þykknar og verður mjúk og glansandi.
Bætið sítrónusafa saman við og smakkið til með salti og pipar.
.
— ÞINGEYRI — FISKRÉTTIR — DÝRAFJÖRÐUR — ÞORSKUR — FISKUR Í OFNI — HOLLANDAISE —
.