Rúllutertukaka með sítrónufrómas – Royale Þuríðar Sigurðar
Rúllutertukaka með sítrónufrómas er klassísk veislukaka sem á sér áhugaverða sögu. Á ensku kallast hún Charlotte Royale og er talin kennd við Charlotte af Mecklenburg-Strelitz, eiginkonu Georg III. Upprunalega var Charlotte kökuheitið notað yfir eftirrétti þar sem mót var fóðrað með köku eða kexi og fyllt með rjóma- eða ávaxtafyllingu.
Í þeirri útfærslu sem við þekkjum best í dag – þar sem rúllutertusneiðum er raðað innan í mót og fyllingin sett í miðjuna – er oft vísað til franska snillingsins Marie-Antoine Carême, sem átti stóran þátt í að móta klassíska franska eftirrétti snemma á 19. öld. Þessi gerð kökunnar er bæði tilkomumikil og óvænt þegar hún er skorin – sannkölluð veislukaka.
Rúllutertukaka með sítrónufrómas – í anda Charlotte Royale
Þuríður Sigurðardóttir, söngkona og myndlistarkona, birti myndir af glæsilegu afmæliskökuborði sínu þar sem rúllutertukaka með sítrónufrómas var í öndvegi. Þessi fallega og klassíska kaka vakti mikla athygli – ekki að ástæðulausu. Á ensku myndi hún kallast Charlotte Royale.
— ÞURÍÐUR SIGURÐAR – RÚLLUTERTUR — FRÓMAS — TERTUR — EFTIRRÉTTIR — ROYAL —
.
Samsetning kökunnar
Ég notaði hálfa rúllutertu, sem ég hafði bakað og fryst, og hálfa uppskrift af sítrónufrómasi.
Formið sem ég notaði var 20 cm í þvermál.
Rúllutertan er skorin í fremur þunnar sneiðar, um ½ cm, og raðað þétt í hringformið, einnig upp með hliðunum. Sítrónufrómasinu er síðan hellt yfir og kakan látin standa í kæli þar til hún hefur stífnað vel.
HVÍT RÚLLUTERTA – 12-14 sneiðar.
3 egg
1½ dl sykur
2 dl hveiti
1 tsk lyftiduft
½ dl mjólk
Fylling
1–2 dl sulta, t.d. jarðarberjasulta eða blönduð ávaxtasulta
Ofninn er hitaður í 250°C. Smjörpappír er lagður á bökunarplötu og mót útbúið.
Egg og sykur eru þeytt vel saman þar til létt og ljóst. Hveiti og lyftiduft er sigtað saman og bætt varlega út í, og að lokum mjólkinni hrært saman við.
Deiginu er hellt í mótið og því dreift jafnt. Bakað í 5–7 mínútur – ekki of lengi, annars verður erfitt að rúlla kökunni.
Á meðan kakan er í ofninum er gott að leggja bökunarpappír á borðplötu og strá sykri jafnt yfir. Þegar kakan kemur úr ofninum er henni hvolft á sykurstráðan pappírinn, smjörpappírinn dreginn varlega af, sultunni smurt yfir og kökunni rúllað þétt saman eftir langhliðinni.
Sítrónufrómas
Hráefni
½ l rjómi
2 egg
100 g strásykur
Safi úr 2–3 sítrónum
Fínrifinn börkur af ½ sítrónu
7–8 blöð matarlím
Matarlímsblöðin eru lögð í kalt vatn.
Eggjahvítur eru þeyttar stífar og rjóminn þeyttur létt; hvort tveggja geymt í kæli. Eggjarauður og sykur eru þeytt vel saman og helmingi sítrónusafans og berki blandað saman við.
Matarlímið er brætt í vatnsbaði. Afganginum af sítrónusafanum er hellt út í brætt matarlímið og hrært vel. Blandan er síðan hellt í mjórri bunu út í eggjahræruna á meðan hrærivélin gengur.
Rjómanum er varlega blandað saman við með sleikju og að lokum eggjahvítunum.
.
.
— ÞURÍÐUR SIGURÐAR — RÚLLUTERTUR — FRÓMAS — TERTUR — EFTIRRÉTTIR — ROYAL —
.