Ananasostakaka
Ananas er í uppáhaldi, ostakökur eru í uppáhaldi – og þegar þetta tvennt mætist verður útkoman fersk, mjúk og ljúffeng. Þessi ananasostakaka er upplögð í kaffiboð, saumaklúbb eða sumarlegt matarboð. Kosturinn er líka sá að hana má útbúa daginn áður, sem gerir allt mun þægilegra þegar gesti ber að garði. Árdís systir mín bauð upp á þessa góðu köku á dögunum og hún hvarf ljúflega af borðinu.
— OSTAKÖKUR — ANANAS — TERTUR — ÁRDÍS HULDA —
Ananasostakaka
Botn
250 g gott kex, t.d. hafrakex með karamellu og súkkulaði
50 g smjör, brætt
Myljið kexið, til dæmis í matvinnsluvél, og blandið bræddu smjörinu saman við. Þrýstið blöndunni í botn á kökuformi og kælið á meðan fyllingin er útbúin.
Fylling
400 g rjómaostur
4 eggjarauður
6 msk sykur
1 msk sítrónusafi
4 msk ananaskurl
1 peli rjómi, þeyttur
4 blöð matarlím
Leggið matarlímið í kalt vatn í um 5 mínútur. Bræðið það síðan yfir vatnsbaði ásamt sítrónusafanum og látið kólna aðeins.
Þeytið rjómaost, eggjarauður og sykur vel saman. Bætið ananaskurli út í. Hellið matarlímsblöndunni saman við í mjórri bunu og þeytið vel á meðan. Að lokum er þeytta rjómanum hrært varlega saman við.
Hellið fyllingunni yfir botninn og kælið í að minnsta kosti 4 klukkustundir.
Hlaup
½ lítri hreinn ananassafi
4 blöð matarlím
Leggið matarlímið í kalt vatn í um 5 mínútur. Bræðið það síðan í ananassafanum yfir vatnsbaði og kælið aðeins. Hellið varlega yfir kökuna og kælið þar til hlaupið er orðið stíft.
Fleira áhugavert:
— Hjónabandssæla mömmu – Draumaterta dásamlega góð — Hvítlaukskartöflur Helgu – Heill kjúklingur í ofni, mjöööög góður – Vínartertan góða og fræga – Sælgætismolar — Salat með eggjum og beikoni — Steikt lambalifur með ávöxtum og rjómakarrýsósu –