Sunnudagskaffi hjá Hlín Péturs Behrens
Nýlega flutti Hlín Pétursdóttir Behrens söngkona til Egilsstaða. Hún kallar nú ekki allt ömmu sína og hefur látið hendur standa fram úr ermum á söng- og leiklistarsviðinu, enda með eindæmum hugmyndarík og orkumikil. Það virðist alltaf vera pláss fyrir gott og skapandi fólk og Egilsstaðabúar og Austfirðingar eru gæfusamir að fá hana til liðs við sig á menningarsviðinu.
Þessar uppskriftir eru frá móður minni, Ragnheiði Sigurgrímsdóttur frá Holti í Flóa. Obbukakan örugglega frá ömmu, Unni Jónsdóttur, Obba var vinkona á Selfossi.
— EGILSSTAÐIR — DÖÐLUTERTUR — EPLATERTUR — SUNNUDAGSKAFFI —
.
Döðluterta
2 stór egg, við stofuhita
½ bolli sykur
¼ bolli hveiti
1 tsk lyftiduft
10 – 12 döðlur, saxaðar
50 g súkkulaði, saxað fínt
Eggin þeytt, sykrinum bætt við, þeytt vel. Þurrefnum blandað varlega saman við. Döðlur og súkkulaði söxuð og látið í skál, deiginu hellt yfir, blandað varlega. Formið smurt með smjöri og klætt með hveiti, bakað við 150° þar til botnarnir eru gullinbrúnir og losna frá hliðunum á forminu. Botnarnir kældir og tertan síðan skreytt með rjóma og smá söxuðu súkkulaði. Uppskriftin á við einn botn, það er alveg hægt að baka einn botn í litlu formi og vera með netta tertu, t.d. í eftirmat.
Viðbót frá Jónu frænku frá Háeyri á Eyrarbakka, (mágkonu mömmu): Deigið verður enn betra ef einni matskeið af kartöflumjöli er bætt við hveitið. Svo má blanda stöppuðum banana við rjómann, mjög ljúffengt.
Obbukaka (Eplakaka)
3 egg
150g sykur (hrásykur)
150 g smjör
150 g hveiti
1 tsk lyftiduft
Þeytið smjör við stofuhita og svo sykur saman við þar til blandan verður létt og ljós. Bætið eggjunum við, einu í einu og þeytið á milli. Blandið lyftiduftinu vel saman við hveitið og blandið því varlega við deigið. Látið eitt lag af deigi og þunnt skorin epli ofaná og svo annað lag af deigi og raðið svo eplum ofaná. Gott er aðskreyta með möndluflögum og strá kanil yfir. Hitið ofninn í 180°og bakið í miðjum ofni í 45 mínútur, eða lengur ef þarf.
Ég læt yfirleytt 1/3 eða ¼ hluta Rapadura sykur eða kókospálmasykur og bókhveiti, kakan verður enn ljúffengari.
Obbukakan er með suðusúkkulaði, söxuðum valhnetum eða hesilhnetum og jafnvel döðlum staðinn fyrir epli.
— EGILSSTAÐIR — DÖÐLUTERTUR — EPLATERTUR — SUNNUDAGSKAFFI —
.
