Caponata – litrík klassík frá Sikiley
Caponata er einn af mínum uppáhalds réttum frá Sikiley – sannkölluð bragðsprengja sem kitlar bragðlaukana. Þetta er sígildur grænmetisréttur þar sem eggaldin leikur aðalhlutverkið, en með í för eru tómatar, laukur, sellerí, ólífur, kapers og edik. Einföld og heillandi samsetning.
Það sem mér finnst svo skemmtilegt við caponata er sagan. Upphaflega var þetta fátækramatur – einfaldur réttur úr því sem til var hverju sinni. En í dag er Caponata orðin sannkallaður veisluréttur, borin fram bæði á fínum veitingastöðum og heimilum um alla Sikiley.
Caponata er oft borið fram volgt eða kalt, sem meðlæti, forréttur eða á smáréttaborði. Mér finnst hún líka dásamleg á ristuðu brauði eða með góðum osti. Caponata geymist vel og verður jafnvel betri daginn eftir – sem getur verið mikill kostur.
— SIKILEY — ÍTALÍA — EGGALDIN — VEGAN —
🇮🇹
Caponata – litrík klassík frá Sikiley
1/2 b ólífuolía, eða meira
1 meðal eggaldin í 2 cm bitum
3 meðal sellerístilkar í 1 cm bitum
1 lítill laukur, í 1 cm bitum
1/2 b grænar ólífur, saxaðar
2 msk kapers, síað
3/4-1 b tómatsósa, góð
2-3 msk rauðvínsedik
1/2 msk sykur
Handfylli af steinselju/basil saxað
Focaccia með
Steikið eggaldin þar til gullið, ekki of mikið í einu. Setjið á eldhúspappír.
Steikið lauk og sellerí í 5-7 mín, þar til mjúkt. Bætið við ólífum, kapers og tómatsósu og látið malla. Bætið við ediki og sykri og síðast eggaldini.
Látið malla í 2 mín, bragðið til, bætið í ediki ef þarf og látið malla áfram þar til aðeins fer að þykkna.
Látið kólna á borði. Hrærið steinselju/basil saman við og kælið yfir nótt.
— SIKILEY — ÍTALÍA — EGGALDIN — VEGAN —
🇮🇹
